Ulttyq patrıotızm úlgisi kindik qanyń tamǵan jerden, týǵan ólkege súıispenshilikten bastalady. Qalalyq bolyp júrgenderdiń qaı-qaısysy da osy shaǵyn mekenderdiń topyraǵy syılaǵan sarqylmas qýattyń kúshimen azamattyq bolmysyn qalyptastyryp, ómirlik maqsatyn oryndap keledi.
Elbasy Nursultan Nazarbaevtyń «Egemen Qazaqstan» gazetinde jarııalanǵan «Bolashaqqa baǵdar: rýhanı jańǵyrý» atty baǵdarlamalyq maqalasynda «Patrıotızm kindik qanyń tamǵan jerińe, ósken aýylyńa, qalań men óńirińe, ıaǵnı týǵan jerińe degen súıispenshilikten bastalady» dep tereńnen qozǵaǵany da sondyqtan. Memleketke degen súıispenshilik týǵan jerge degen ystyq yqylastan bastaý alady.
Alaıda, aýylynan áldeneshe jyl buryn uzap ketkender kúzgi japyraqtaı sarǵaıǵan saǵynyshyn jyly esteliktermen bólisse ǵana basylatyndaı, jarysa áńgimelep, sol sátte ǵana sóz etýmen shektelip, ýaqyt óte kele tym-tym alystaı bastaıtyny bar. Qalanyń ý-shýynan qashqandaı, qaýyrt tirshiliginen kóńili qalǵandaı bolyp «Ah, meniń aýylym», «qaıran, meniń qara orman, altyn besigim» dep tanaýyn jeline, keýdesin kókoraı shalǵynyna tósep, úzdigip barǵandardyń ózderi eki kúnnen artyq shydaı almaı, shaharyn betke alyp jatady. Tirshilik qamymen qala jaǵalap, qonys tepkender de sharýasy bolmasa, tıip-qashyp bara bermeıdi.
Memleket basshysy N.Nazarbaevtyń baǵdarlamalyq maqalasynan taıaý jyldarǵa belgilegen mindetteriniń ishinde «Týǵan jer» baǵdarlamasy qabyldanatynyn, onyń aýqymy birtindep «Týǵan elge» ulasatynyn oqı otyryp kóńilimdi maqtanysh sezimi kernedi. Elbasynyń «Aýylym – ánim» atty ándi aıtqanda, «Týǵan jerin súıe almaǵan, súıe alar ma týǵan elin» dep shyrqaıtyn edik qoı. Bajaılap qarasaq, bul maǵynasy tereń sózder» degeni tamyry týǵan jerine baılanǵan qazaqqa «altyn qazyǵyńnan alystama» degendi aıqyn ańǵartady.
Bárimiz de aýylda týdyq, qara topyraǵynda asyr salyp óstik. Shet elderge saparǵa shyqqanda únemi jýsany ańqyp, tútini burqyraǵan aýylym kóz aldymda turatyn. Aýylǵa degen saǵynyshtan bir áýenniń sazy kókiregime kelip quıylyp júrýshi edi. О́zim de arasynda yńyldap qoıamyn. Ara-tura «osy áýenniń sózin kimge jazdyrsam eken?» dep oılap qoıamyn. Sóıtip, aqyn Bákir Tájibaevqa qolqa saldym. Bul, shamasy, 1974 jyl bolatyn. Ol da aýyldan shyqqan azamat qoı, demde jazyp berdi. Elbasynyń týǵan jerge qatysty sózine arqaý bolǵan «Aýylym – ánim» osylaı týǵan edi.
Elbasynyń maqalasy týrasyn aıtqanda, ultymyzdyń uıasy, altyn besigi, yrystyń kindigi sanalyp kele jatqan aýyl týraly salıqaly sózi kóńilge erekshe bir serpin berdi. Aýyl túlese – qazaq túleıdi. О́ıtkeni, aýyl men qazaq ajyramas uǵymdar.
Memleket basshysy Nursultan Nazarbaev «Adam balasy – sheksiz zerdeniń ǵana emes, ǵajaıyp sezimniń ıesi. Týǵan jer – árkimniń shyr etip jerge túsken, baýyrynda eńbektep, qaz basqan qasıetti mekeni, talaı jannyń ómir-baqı turatyn ólkesi. Ony qaıda júrse de júreginiń túbinde áldılep ótpeıtin jan balasy bolmaıdy» dep jazady baǵdarlamalyq maqalasynda. Júrek tebirenterlik, týǵan jerdiń ulylyǵyn uǵyndyrar sózder. Aldaǵy ýaqytta «Týǵan jer» baǵdarlamasynyń aıasynda týǵan eldiń de eńsesi bıikteıtini sózsiz.
Eskendir HASANǴALIEV,
Qazaqstannyń halyq ártisi, Memlekettik syılyqtyń laýreaty
ALMATY
