Qymbatty Nursultan Ábishuly!
Keshe ǵana jarııalanǵan Sizdiń «Bolashaqqa baǵdar: rýhanı jańǵyrý» atty taqyryppen jarııalaǵan maqalańyzben tanysyp, Almaty qalasynyń zııaly qaýymynyń bir toby búgin arnaıy bas qostyq. Biz muny maqala emes, baǵdarlamalyq mańyzdy qujat retinde qabyldap otyrmyz. Kópten beri ańsap júrgen armandarymyz, elimizdiń ishki qajettiligine aınalǵan jańa qadamdar jan-jaqty ári serpilis týǵyzyp, shyn máninde barshamyzdy qýanyshqa bóledi.
Qujattyń basty ereksheligi – munda qazaq degen halyqty Máńgilik Táýelsiz memleketke aınaldyrýdyń naqty baǵyttary, sol joldaǵy maqsat-mindetteri atap kórsetilipti. Baǵdardyń ón boıynan eldi alǵa talpyndyrý, jigerlendirý, qaıraý, jetildirý nıeti aıqyn ańǵarylady. Tarıhı tájirıbe men ulttyq dástúrlerimizdi kózdiń qarashyǵyndaı saqtaı otyryp, basqa elderdiń de ozyq úlgisin qabyldaı bilý – tabystyń kilti ekeni qarapaıym tilmen, qamqor nıetpen tamasha túsindirilgen. Bir sózben aıtqanda, keıbir kertartpa ádetterden arylyp, halqymyzdyń san ǵasyrlardan beri jınaqtalyp, júıelengen salt-sanasyn, mánin joımaıtyn asa qundy qasıetteri men dástúrin saqtaı otyryp damýǵa, ulttyq modıfıkasııadan ótýge úndeıdi.
Tutas alǵanda, elimizdi kezekti bıik beleske bastap otyrǵan Siz, Nursultan Ábishuly, halyqqa oıan, serpil, shyńdala tús, qaırattan dep, halqyńyzdyń sanasyn, minezin ózgertýge, qaıyrly nárselerge umtylýǵa shaqyryp otyrsyz. «Seniń mineziń – seniń taǵdyryń» deıtin danalyq sóz ras bolsa, bul baǵdar, sóz joq, qazaq halqynyń baqytyn baıandy etýge yqpalyn tıgizeri daýsyz.
Baǵdarda sanany jańǵyrtýǵa baılanysty birneshe naqty mindetter qoıylǵan. Latyn álipbıine kóshý, zaman talabynan qalmaı, aǵylshyn tilin úırený, kúnkóris úshin ekonomıkalyq jaǵdaılar qalyptastyryp otyrǵan jańa kásipterdi ıgerý, bilim sapasyn arttyrý úshin álemniń úzdik 100 oqýlyǵyn qazaq tiline aýdaryp, jastarymyzǵa usyný sııaqty mándi de mańyzdy maqsattar alǵa tartylypty. Sonymen qatar, «Týǵan jer», «Týǵan el» baǵdarlamalaryn qurý jaıly ıdeıa, árbir aýyl-aımaqty qadirlep-qasterleýge shaqyrý, elimizdiń qasıetti jerleriniń mádenı-geografııalyq beldeýin qurý, mádenı qazynalarymyzdy álem jurtshylyǵynyń nazaryna usynýdyń jańa tásilderin qarastyrý bastamasy bizdi qanattandyrdy. Otandastarymyzdyń, jastardyń patrıottyq sezimin qalyptastyratyn mundaı sharalardyń, sondaı-aq, baǵdarda kóterilgen ózekti máselelerdiń barshasynyń is júzine asýyna biz, aǵa býyn ókilderi, barynsha kúsh salýǵa daıyn ekenimizdi О́zińizge jetkizemiz.
Almaty qalasynyń zııaly qaýym ókilderi atynan:
Asanáli Áshimov, О́mirzaq Aıtbaev, Sábıt Orazbaev, Beksultan Nurjekeev, Esmuqan Obaev, Dandaı Ysqaqov, Dos Kóshim, Talǵat Mamashev, Kádirbek Segizbaev, Sultanáli Balǵabaev, Erden Qajybek, Smaǵul Elýbaev, Esenǵalı Raýshanov, Ábdesh Tóleýbaev, О́mirbek Baıtursynov, Marat Toqashbaev, Áshirbek Kópishev, Janarbek Áshimjan, Álibek Asqarov jane basqalar (barlyǵy 71 adam).
Almaty qalasy, «Dostyq» úıi,
2017 jylǵy 13 sáýir
