Basylymnyń alǵashqy sanynda qazaq jerin totalıtarlyq tar zamanda bólshektep qurtpaqshy bolǵan KSRO basshysy N.S.Hrýshevtiń surqııa saıasatynan elimizdiń soltústik bóligin sol kezeńde Qazaq KSR Mınıstrler Keńesiniń tóraǵasy bolǵan Jumabek Táshenovtiń qalaı qorǵap qalǵany jaıly naqty derekter keltirilgen.
«Elbasy Nursultan Nazarbaevtyń «Bolashaqqa baǵdar: Rýhanı jańǵyrý» atty maqalasyndaǵy «Týǵan jer» baǵdarlamasy jalpy ulttyq patrıotızmniń naǵyz ózegine aınalady, biz jat ıdeologııalarǵa ózimizdiń ulttyq qundylyqtarymyz arqyly ǵana tótep bere alamyz», degen sózderine oraı, halqymyzdyń rýhanı murasyn jańǵyrtýǵa atsalysý qaı-qaısymyzdyń da mindetimiz. Biz Otanymyzǵa adal qyzmet etý jolynda 1954-56 jyldary Qazaqstannyń soltústik-teriskeı 6 oblysyn Reseıge qosylyp ketpeýi úshin joǵary laýazymdy qyzmetin tárk etip qorǵap qalǵan Jumabek Táshenovteı el men jer úshin kúresken qaıratkerlerdi úzbeı nasıhattaýǵa tıispiz», – dedi akademık Meńdibaı Myrzahmetov jıyn barysynda.
«Jýrnaldy ashýdaǵy basty maqsatym – jastardy patrıottyqqa tárbıeleý, memleket tiregi – ult rýhyn kóterý. Jumabek Táshenovtiń Otan aldyndaǵy paryzyn adal oryndaǵanyn jáne sondaı ult qaharmandarynyń ómir joldaryn, el men jerge sińirgen eren eńbekteri men orasan erlikterin jurtshylyqqa pash etý», – dedi jýrnaldy shyǵarýshy ári redaktory Ertis Nurqasym. Al jýrnaldyń jaýapty hatshysy Aıym Arǵyntegi «Jýrnalymyzdyń birinshi sany myń danamen basyldy. Halyq tarapynan úlken qyzyǵýshylyq týyndap otyr. Aldaǵy sandaryn myńnan asyratynymyz anyq. «Jumabek joly» jýrnalynyń jazylý ındeksi – 74967. Osy sharaǵa belsene qatysqan ǵalym aǵalarymyz ben apaılarymyzǵa, uıymdastyrǵan kitaphana qyzmetkerlerine kóp rahmet», – dep óz rızashylyǵyn jetkizdi.
«Jumabek joly» jýrnaly tek Jumabek Ahmetulynyń ómir jolymen ǵana shektelmeı, Otanymyzdy qorǵaýda erlikterimen, ónegeli isterimen kópshilikke úlgi bolǵan ózge de alyp tulǵalar jaıly estelikterdi jastar jadynda jańǵyrtyp otyrýdy kózdeıtinin aıtqan jýrnal basshylyǵy Memleket basshysynyń elimizdiń rýhanı jańǵyrýyna baǵyttalǵan bastamasy boıynsha qoǵam jáne mádenıet qaıratkerleriniń taǵylymdy ómirleri týraly da kóptep qalam terbeıtinderin jetkizdi.
Qabdesh Jumadilov aqsaqal bastaǵan jazýshy-jýrnalıster qaýymy, tarıhshy Serikqazy Hasenov, Almaty qalalyq «Tospa sý» kommýnaldyq sý sharýashylyǵynyń basshysy Nurıddın Jarbolov, kınorejısser Qalıla Omarov syndy zııalylar qatysyp, pikir bildirgen jıynda tek jer máselesinde ǵana emes, ulttyń tili, rýhy sanalatyn basylymdar úshin de teńdessiz erlikter jasaǵan, zııaly qaýymǵa barynsha qamqor bolǵan, qarapaıym eńbek adamdaryna árdaıym janashyrlyq tanytqan Táshenov tulǵasynyń qyr-syry keńinen sóz boldy.
Mıra BAIBEK,
«Egemen Qazaqstan»
ALMATY
