Balalarǵa bazarlyq

Jyldaǵy dástúr boıynsha  Astana­nyń týǵan kúni túrli mádenı sharalarmen jalǵasyp jatatyny belgili. «Toı­dyń bolǵanynan boladysy qyzyq» degen halyq naqylynyń  aına-qatesiz keletinin osy bir shattyqqa toly mereke kúnine deıingi ótetin is-sharalar legi taǵy bir eske túsiredi. Sonyń biri keshe  «Kerýen» oıyn-saýyq ortalyǵynyń  «Kinopark 7» kınoteatrynda  balǵyn­dar­ǵa ar­nalǵan  «Báıterek» atty mýl­tı­p­lıkasııalyq fılmniń tusaýke­seri­niń ótýi der edik. Atalmysh anımasııalyq fılm –  joba avtorlarynyń el táýelsizdiginiń  20 jyldyǵy men  Astana kúnine jasa­ǵan tartýy. Mýltfılm ekranǵa qazaq tilinde jaryqqa shyqsa, orys tilinde sýbtıtrmen berilgen. Jobanyń jaryq­qa shyǵýyna  Astana qalasy ákimdigi men mádenıet basqarmasy muryndyq bolypty. «Báıterek» – bul jas kórermen­der­ge baǵyttalǵan shytyrman oqıǵaǵa toly anımasııalyq fılm. Sıýjet jelisi boıynsha fantastıkalyq teris kúshter  Táýelsizdik kúni merekesine balta shap­paq bolady. Dushpandar beıbitshilik pen molshylyqtyń belgisi bolǵan  «Báı­terek» ómir aǵashynyń ushar bıigindegi alyp  samuryq qustyń  kún tá­rizdi  altyn tústes jumyrtqasyn ur­lap, sol arqyly álemge  alasapyran men  astan-kesten ornatpaq bolady. Sondaı-aq fılmde qazaq ertegilerindegi keıipkerler de jańa qyrynan kórinedi. Al qaladaǵy  Beıbitshilik jáne kelisim saraıy, Sırk ǵımaraty,  Han  Shatyr syndy ǵajaıyp qurylys nysandary fılmdegi  Astana kelbetin asha túsedi. Anımasııalyq fılmdi túsirgen ssenarıı avtory ári bas prodıýseri  Ábdiqadir  Sabyr: «Bul   on eki jasqa deıingi  óskeleń urpaqqa arnalǵan tý­yn­dy bolǵandyqtan, bularǵa alǵashqy kezekte patrıottyq tárbıe berý men  Báıterektiń qasıetin túsindirýdi basty maqsat etip aldyq. Kóp jetkinshekterimiz ony  sýretterden tamashalap,   Astana dep qana túsinip júr. Al mýlt­fılmdi kórgennen keıin onyń qandaı qasıeti bolǵanyn, ony ne úshin saqtaý, qorǵaý kerek ekenin jiti túsiner degen nıettemiz. Biz osyny túsindirýge ty­rys­tyq. Shyǵarmadaǵy oqıǵa  Táýel­siz­dik­tiń  20 jyldyǵy emes, 200 jyldyǵy kezeńinde bolyp jatqan oqıǵa bolyp ta­bylady. Iаǵnı, bul aldaǵy bolashaq tó­ńiregindegi oqıǵa bolyp órbıdi», –  deıdi. Mýltfılm  «Astana-Kompleks»  kor­porasııasy»  JShS janyndaǵy  «Báı­terek» kınostýdııasynda jasalǵan. Onyń uzaqtyǵy on mınótti qamtıdy. Keıipkerlerdi dybystaý kezinde eki daýys paı­dalanylypty. Qazaq tilindegi dýblıajdy  Erjan  Emelhan men  Jan­qal­dybek  Tó­len­baev jasapty. Otan­dyq anımator­lardyń  jańa bul mýltfılmin  1-6 shilde aralyǵynda  «Kınopark» kınoteatr­lar jelisinen tama­shalaýǵa bolady. «Báıterek» týyndysynyń avtor­lary aldaǵy ýaqytta fılmniń kelesi serııasyn túsirýdi josparlaýda. Ábdirahman  QYDYRBEK.