«Aq jol» men «Atameken»: Túpki maqsattary bir

Senbi kúni Astanadaǵy Kúlásh Baıseıitova atyndaǵy opera jáne balet teatrynda «Aq jol» demokratııalyq partııasynyń VIII sezi boldy. Onyń jumysyna bul jolǵy qyzyǵýshylyq basqa ýaqyttardaǵydan erekshe boldy desek, artyq aıt­qan­dyq emes. О́ıtkeni, osydan bir kún ǵana buryn «Aq joldyń» kóshbasshysy Álıhan Baımenov memlekettik qyz­metke aýysyp, Prezıdenttiń Jarlyǵymen Memlekettik qyzmet agenttiginiń tóraǵasy qyzmetine ta­ǵaıyn­dalǵan bolatyn. Endi partııanyń jańa basshysy kim bolar eken degen áýestik biraz adamdardyń, sonyń ishinde BAQ ókilderiniń de nazaryn ózine aýdarǵan edi. «Aq jol» demokratııalyq partııasy – syndarly oppozısııalyq baǵyttaǵy partııa. Ol elimizde júr­gi­zilip jatqan qoǵamdyq-saıası jáne ekonomıkalyq re­formalardy syn tezine alyp otyrsa da, onyń jetistikteri týraly da durys baǵa bere bilgen saıası kúsh. Onyń saıası kredosy: «Soqyr ǵana jetistikti, enjar ǵana problemalardy kórmeıdi» degen uran boldy. Uzaq jyldardan beri «Aq jol» DP lıderi bolǵan Álıhan Baımenov óziniń bir sózinde partııa múshelerine: «Biz Qazaqstannyń múddesin umytpaı, bılikti soǵan sáıkes qoldaıtyn jerdi jáne synaıtyn jerdi aıyra bilýimiz kerek», degen edi. Al óziniń jeke basynyń ustanymy týraly aıtqanda ol: «Men úshin eń basty qundylyq táýelsizdik jáne qazaq múddesi. Menimen memlekettik qyzmette de, qoǵamdyq-saıası jumysta da birge bol­ǵandar meniń árdaıym osy ıdeıa men qundylyqty basshylyqqa alatynymdy biledi. Baılyq pen mansap, shen men shekpen meni qyzyqtyrǵan emes», degen edi óziniń suhbattarynyń birinde. Sezde sóılegen sózinde Álıhan Baımenov búgingi kúni Qazaqstannyń aldynda mańyzdy mindetter turǵanyn atap ótti. Ekonomıkany jańǵyrtý jáne básekege qabiletti 50 eldiń qataryna ený – bizdiń aınymas baǵdarymyz. Bizdiń respýblıkamyz álemniń jańa tarıhynda óziniń laıyqty ornyn aldy dep aıta alamyz. Alaıda, osyny túsine otyryp bizdiń halqymyz óziniń ulttyq múddesin, basym­dyqtaryn árqashanda qaperden shyǵarmaǵany jón. Prezıdent N.Nazar­baev­tyń durys saıasaty men hal­qymyzdyń shydamdyly­ǵynyń arqasynda biz turaqty damýdy qamtamasyz ete aldyq. Aqjoldyqtar Táýel­sizdiktiń 20 jylynda elimizdiń bıik tabystarǵa jetkenin biledi. Sonymen birge, bizdiń partııa da jańa belesterge jetip otyr, ol qazir ózin qalyptasqan demokratııalyq kúsh dep aıta alady. Osynaý jyldarda «Aq jol» elimizdi turaqty damý jolyna bastaıtyn ıdeıalardy ǵana usynyp keldi. Biz «ýrapatrıot» bolǵan joqpyz, kerisinshe, qazaq­standyq­tardyń áleýmettik-ekonomıkalyq turǵydan qoldaý kórýine kóńil bóldik. Búgingi kúni partııanyń aldynda óziniń qataryn halyqtyń áleýmettik belsendi tobynan múshe tartý arqyly tolyqtyrý mindeti tur, dedi ol. Odan ári tóraǵa ekonomıkalyq belsendi adamdar kásipkerler toby ekenin aıta kelip, olardyń atyna bir­qatar jaqsy lebizder bildirdi. Olar ózderiniń múddesin qorǵaýdy úırendi, túrli odaqtar men assosıasııalar tóńiregine toptasýdy da bilikti júrgizetin boldy. Qazir olar, birtindep, qoǵamdyq-kásibı deń­geıden asyp, endi ózderiniń múddesin saıası partııa arqyly ókiletti organda qorǵaı alatyn dárejege jetti, dedi Á.Baımenov. Son­daı-aq ol búgingi kúnge deıin kásipkerlerdiń múddesin qorǵap kelgen «Atameken» UEP tóraǵasy Azat Perýa­shevtiń osy maqsatty júzege asyrý úshin «Aq jol» DP qataryna ótkisi keletinin jáne ony qabyldaı otyryp, tóraǵalyqqa usynatynyn aıtty. Sonymen, «Aq jol» QDP-nyń jańa tóraǵasy bo­lyp Azat Perýashev biraýyzdan saılandy, al Álıhan Baımenovti sezd partııa tóraǵalyǵynan qurmetpen bosatty. Azat Perýashev – saıası partııada buryn da lıder bolǵan tájirıbeli saıasatker. Onyń «Azamattyq par­tııasy» ózi tıptes «Agrarlyq partııa» bári «Nur Otan» HDP-men birikken ýaqyttan beri Azat Perýashev partııa saıası bıýrosynyń múshesi bolatyn. Maýsymnyń 1-inde ol «Nur Otan» HDP qatarynan jáne onyń saıası bıýrosy quramynan óz erkimen shyqty. Endi ol syn­darly oppozısııalyq baǵyt ustanatyn partııany basqarǵaly otyr. «Aq jol» DP-nyń sezinde sóılegen alǵashqy sózinde A.Perýashev aldaǵy bolatyn parlamenttik saılaýda partııa daýys berýshilerdiń 20 paıyzdyq úlesin alýǵa umtylatynyn málimdedi. Biz osy nátıjeni betke alyp jumys isteıtin bolamyz. «Aq jol» partııasynyń halyq arasyndaǵy tanymaldyǵy men ustanǵan jo­lynyń aıqyndyǵyna qaraǵanda, bul eńserýge ábden bolatyn meje, dedi ol. «Aq joldyń» bolashaǵy týraly aıtqanda, jańa tóraǵa onyń ustanǵan baǵytynan aınymaıtynyn, ıaǵnı syndarly oppozısııalyq kúsh bolyp qala beretinin jetkizdi. Bizde pikir alýandyǵy bolýy asa mańyzdy. Parlamentke ótetin bolsaq, biz onyń jumysyna ózimizdiń tyń pikirlerimizben, syn­darly usynystarymyzben jan kirgizer edik, dedi ol. Sonymen qatar, «Aq jol» partııasy keıbireýlerge jeke ózderiniń saıası shamshyldyǵyn qanaǵattandyrýdy kózdeý úshin qoldanatyn uıym emes, tek shyndyqty aıta alatyn partııa bolatynyn jáne sol arqyly basqalardan erekshelenetin saıası kúsh ekenin atap ótti. Sezden soń «Aq jol» demokratııalyq partııasy­nyń jańa tóraǵasy jýrnalısterdiń kóptegen suraq­taryna jaýap berdi. Aldymen ol ózin tóraǵalyqqa saılaǵan partııa delegattaryna rızashylyǵyn bildirdi. Meniń bul sheshimge kelýime sebep bolǵan «Atameken» ulttyq ekonomıkalyq palatasyndaǵy jumysym boldy, dep bastady ol óziniń jýrnalısterge jasaǵan málim­demesin. Men kásipkerlerdiń múddesin zań shyǵarý organynyń múshesi bolmasań qorǵaý óte qıyn ekenine kózim ábden jetti. Qazir depýtattar zańdy ázirleıtin organdarmen ǵana sanasyp, múddeli jaqtardyń usynysy men pikirlerin esepke almaıdy. Osynyń saldarynan qabyldanǵan kóptegen zańdar kásipkerlikti qoldaýdy emes, onyń qolyn baılaýǵa soǵyp jatady. Sondyqtan da jaqtastarymmen aqyldasa otyryp, «Aq jol» partııasyna ótýdi, sosyn Parlamenttegi depý­tattyq oryndar úshin kúresýdi murat tutyp otyrmyn. Saıyp kelgendegi bizdiń maqsat – elimizdegi kásip­kerlikti damytý jáne ony básekelestikke qabiletti deńgeıge jetkizý. Ulttyq ekonomıkalyq palatanyń tóraǵasy qyz­metinen endi ketetin shyǵarsyz degen suraqqa Azat Perýashev bultara jaýap berdi. Árıne, dedi ol, saıası jáne ekonomıkalyq eki qurylymdy qatar basqarý ońaı emes, men kóp stanokta qatar isteı beretin jumysshy emespin ǵoı. Bul másele ústimizdegi jyly bolatyn palatanyń kongresinde sheshiledi. Osylaı degen ol oǵan deıin eki jumysty qatar atqaratynyn aıtty. Jýrnalısterdiń «Atameken» Ulttyq ekonomıkalyq palatasy «Aq jol» demokratııalyq partııasymen birigýi múmkin be degen suraǵyna Azat Perýashev mun­daıdyń múmkin emestigin kóldeneń tartty. «Atameken» eko­nomıkalyq qurylym retinde óziniń tetikteri arqyly ká­sipkerlerdiń múddesin jaqtaýmen aınaly­sady. Al «Aq jol» partııa retinde Parlamentte kásip­kerlikti qol­daýdy saıası jolmen atqaratyn bolady, dedi ol. Al keshe «Aq jol» demokratııalyq partııasynyń jańa tóraǵasy Azat Perýashev jýrnalıstermen bas­pasóz máslıhatyn ótkizip, óziniń saıası partııada usta­natyn baǵdaryn, «Aq joldyń» jaqyn bolashaqtaǵy strategııasy men taktıkasy qandaı bolmaǵyn aıtyp berdi. Ol burynǵysha syndarly oppozısııalyq baǵyt ustanatynyn atap kórsete kelip, qoǵamda barlyq ha­lyqqa estiletin úni bar balamaly pikirlerdiń bolýy qajettigin jarııa etti. Jaqsybaı SAMRAT.