Sahna óneriniń ǵajaıyp merekesi

Kók Esilge aqqýdaıyn qonyp, qos qanatyn qulashtaı jaıǵan arý Astana Elbasynyń uly armanynyń, jasampaz eńbeginiń jemisi. Ol kún­nen kúnge qulpyryp, HHI ǵasyrdyń ásem qalalarynyń birine aınalýda desek, Prezı­denttiń arnaıy Jarlyǵymen 2000 jyly osy qalada dúnıege kelgen Kúlásh Baıseıitova atyn­daǵy Ulttyq opera jáne balet teatry búginde qanaty qataıǵan irgeli óner ordasyna aınaldy. Iá, respýblıkamyzdaǵy eń jas mýzykalyq teatr nebári 10 jyl ishinde elimizdiń mańdaı­aldy óner ujymynyń biregeıine aınalǵanyn úlken maqtanysh sezimmen aıtýymyzǵa bolady. Ulttyq teatr óz jumysynyń kórkemdik-kási­bılik deń­geıin bul saladaǵy álemniń órkenıetti degen elderi teatrlarynyń terezesimen teń etti, halyq­aralyq básekelestik ortada qashanda aldyńǵy qatardan kórinip keledi. Bul – fenomendi quby­lys Memleket basshysynyń ónerge degen shynaıy qamqorlyǵynyń arqasynda júzege asýda. Mine, deni jastardan turatyn osy teatr ujymy Almatyda bolyp, ondaǵy jurtshylyq nazaryna bes sahnalyq qoıylymdy usyndy. Atap aıtqanda, Almas Serkebaevtyń «Astana» mıýzıkli, Ádil Bestibaevtiń «Báıterek», Levensholdtiń «Sılfıda», L.Mınkýstiń «Baıaderka» baletteri, Dj.Pýchchınıdiń «Bogema» jáne «Manon Lesko» operalary. Bul K.Baıseıitova atyndaǵy opera teatry tarıhynda Almaty qalasyna barǵan úshinshi gastroldik sapary. Bir aıta ketetin jaıt, barlyq qoıylymdar tolyq anshlagpen ótip, teatr ánshileriniń, bıshi­leriniń, orkestr jáne hor ártisteriniń óneri Alma­ty kórermenderiniń bıik talǵamynan shyqqanyna kýá boldyq. Ulttyq opera teatrynyń barlyq shyǵarmashylyq-tehnıkalyq toptary men qyzmet­ker­leri dombyranyń qos shegindeı úndestikte qyzmet jasap, kórermenniń zor yqylasyna ıe boldy. Budan teatr ujymynda shyǵarmashylyq-kásibılik talaptardyń bıik deńgeıde ekeni tanyldy. Quramynda 400-den asa adamy bar opera teatrynyń Almatyǵa barýyna jaǵdaı jasap, on­daǵy jurtshylyqqa otandyq jáne ozyq klas­sıkalyq týyndylardy kórsetý – mol kólemdegi qarjyny talap etetin sharýa. Bul turǵyda bıik ónerdi damytýǵa bar kómegin berip kele jatqan Mádenıet mınıstrliginiń nátıjeli jumysyn erekshe ataǵanymyz jón. Ásirese, osy mınıstrliktiń sońǵy jyldary arnaıy qarjy bólip, mýzyka jáne dramatýrgııa salalary boıynsha «Táýelsizdik tol­ǵaýy» respýblıkalyq konkýrsyn ótkizip kele ja­týy ónerge degen shynaıy qamqorlyqtyń belgisi. Mınıstrliktiń osyndaı keleli isteriniń arqa­synda kóptegen talantty týyndylar dúnıege keldi. Qýanyshtysy sol, jeńimpaz atanǵan týyndylar respýblıkanyń jetekshi teatrlary men konserttik uıymdarynyń sahnasynda qoıyldy. Buǵan otan­dyq kompozıtorlar Almas Serkebaevtyń «Astana» mıýzıkli, Ádil Bestibaevtiń «Báıterek» baleti aıǵaq. Atalǵan týyndylar talǵamy bıik Almaty kórermenderiniń kóńilinen shyqqany osynyń dá­leli dep bilemiz. Bul týyndylardy álemniń eń bedeldi sahnalarynan uıalmaı kórsetýge bolady. Kileń talantty jas ónerpazdardy bıik shy­ǵarmashylyq maqsatqa jumyldyryp, bir jeńnen – qol, bir jaǵadan – bas shyǵarǵan Qazaqstannyń eńbek sińirgen qaıratkeri, teatr dırektory Tóleýbek Álpıev bastaǵan uıymdastyrýshylyq-shyǵarmashylyq toptyń jemisti eńbegin de aıta ketkenimiz jón. Aqordaly Astananyń beldi de belgili mýzy­kalyq mádenı oshaqtarynyń biri K.Baıseıitova atyndaǵy Ulttyq opera jáne balet teatrynyń Qazaqstan táýelsizdiginiń 20 jyldyǵyna ar­nal­ǵan gastroldik sapary Elbasynyń «Má­denıeti ósken el-órkenıetke kóshken el» degen qanatty sóziniń aıqyn kórinisi. Jolaman TURSYNBAEV, kompozıtor, Qazaqstannyń eńbek sińirgen qaıratkeri.