Úmitiń úzilmesin

Qostanaıda  búırek aýrýy­nyń zardabyn shegip júrgender az emes. Adamnyń tirshilik ke­shýiniń bir kilti  bolyp sana­latyn búı­rektiń aýyr syrqatyn asqyndy­ryp alǵandar  tirshilikten qol úzip qalmaý úshin  oblystyq aýrý­hanadaǵy  arnaıy apparattan ap­ta­syna  eki-úsh ret gemodıalız emin qabyldaıdy.  Aýrýhanada «ja­sandy búırek» apparaty beseý ǵana.  Al statıstıka oblysta búı­rek aýrýyna shaldyqqandardyń sany ósip kele jatqanynan habar beredi. Qazir  oblystaǵy ár 800 myń turǵynnyń  arasynan júzge tarta adam  búırek aýrýymen aýy­rady,  sondyqtan olar osy gemodıalız emine zárý eken. Ja­qyn­da Qostanaı qalasynda  Aq­tóbe­degi Bios medısınalyq  orta­ly­ǵynyń  fılıaly ashyldy. Bul ge­mo­dıalız ortalyǵy tek naý­qastardy ǵana emes, oblys dárigerlerin de  qýantyp otyr. Onda  syrqaty janyna batqan  aýrýlarǵa  em jasaıtyn zamanaýı alty apparat bar. Em alý kezinde aýrýlardyń jaǵdaıyn  dá­ri­ger jáne eki medbıke baqylap otyrady. – Apparat ár naýqastyń syr­qatyna qaraı beıimdelip, onyń jaǵdaıyn múltiksiz baqy­laıdy. Tósek janyna bekitilgen monıtordan  naýqastyń qan qy­symy, den­saýlyǵynyń qalyp­ty­ly­ǵyn bildiretin basqa da kór­setkishter kórinip turady.  Eger aýrýdyń hali nasharlap ketken jaǵdaıda jansaqtaý palatasy bar. Bir aýrý gemodıalız emin tórt saǵat alsa, alty apparatqa bir mezgilde alty adam alamyz.  Sonda úsh aýysymda 36 adam  búıregine em alady. Eger bul az bolyp jatsa,  qosymsha taǵy eki apparat qoıamyz, deıdi  gemodıalız ortalyǵynyń dırek­tory Vadım Antones. Onyń ózi  nefrolog jáne toksıkolog dáriger eken. Sondyqtan maman dáriger­diń naýqastarǵa  berer keńesi de mol. Aqtóbelikterdiń usynysy­na Qos­tanaı oblystyq densaý­lyq saq­taý basqarmasy da  ynta bildirdi. Aýrý azabyn shekkender tipti rıza. – Búırek  aýrýynyń osy aýyr túrine shaldyqqandardyń kóbi o dúnıelik bolyp ketti. Men  shybyn janym úshin jylda shet elge baratynmyn.  Myna jańa orta­lyq­tyń  qyzmeti eýropa­lyq­tarǵa jaqyn ekenine sengim keledi. Eń bastysy, dáriger bilikti bolsyn deńiz, deıdi  naýqas  Nellı Golchenko. Mamandardyń aıtýynsha,  Bios medısına ortalyǵyndaǵy apparattar búıregi jumysyn durys atqarmaıtyndardyń ómi­rin 20-25 jylǵa sozady. Bul  ómir úshin ajalmen alysyp júr­gen­derge az olja emes.  Naýqas­tar osyǵan shúkir­shilik etip otyr. Názıra JÁRIMBETOVA, Qostanaı.