О́tken aptada Muqyr aýyldyq okrýgindegi turǵyndar úıinde tabıǵı gazdyń alaýy tutandy. Munda qazir 301 otbasyna gaz jelileri tartyldy. Osy okrýgke qarasty Janterek, Jamansor, Kenbaı eldi mekenderinde de 89 otbasy kógildir otyn tutynýǵa qol jetkizgenine qýanýda. Bul kúnderi okrýgtegi turǵyn úılerge tabıǵı gaz jelilerin tartý jumystaryn «Yntaly», «TEK», «ATTI», «AtlantIka» jáne «IP-Omarov» seriktestikteriniń mamandary júrgizýde. Joldasbek ShО́PEǴUL, Atyraý oblysy. Aýyz sý máselesi sheshiledi Saryaǵash aýdany, Birlesý aýyldyq okrýgindegi 28 gvardııalyq eldi mekenindegi uńǵymada sý bar. Biraq aýyl turǵyndary elektr energııasyna qaryz bolǵandyqtan, sý munarasyna sýdy jetkizip bere almaı keldi. Jaqynda aýdan ákimdigi osy máseleni sheshti. Endi Saryaǵash qalasy, Abaı men jaqyn segiz aýylda jáne 12 eldi mekende aýyz sý júıesiniń qurylysyna 1393,8 mıllıon teńge qarjy bólinip, qurylys jumystary júrip jatyr. Jyl aıaǵyna deıin árbir úıge sý tartyp berý kózdelýde.
Baqtııar TAIJAN, Ońtústik Qazaqstan oblysy, Saryaǵash aýdany.
Altyn qursaq analarǵa marapat. О́tken jyldan beri kóp bala ósirip, tárbıelegen analarǵa memlekettik nagrada berý týraly zańǵa ózgertýler engizilgeni belgili. Sodan bergi kezeńde Taldyqorǵanda 1049 ana Altyn jáne Kúmis alqa ıegerleri atanǵan. Al jyl basynan beri mundaı marapat 234 kóp balaly anaǵa berilip, omyraýlary jarqyraı tústi. Jaqynda olardyń qatary tolyǵyp, shahardaǵy 54 altyn qursaq ana «Altyn alqanyń» ıesi atanyp, qushaqtary gúl shoǵyna toldy.Toǵyz balasy bolǵanymen «Altyn alqa» ala almaǵan Kúlásh Appasova bul joly batyr ana atandy. Toǵyz balasy toǵyz shańyraqtyń ıesi, ózderi de ul-qyz ósirgen. «Altyn alqa» Úkimettiń qurmeti, syıy. Eńbegi baǵalanǵan analar shetinen egemen eldiń erteńi nurly, aspany ashyq bolsyn dep tiledi. Sonymen qatar, ómirimizge laıyqty órender ósirýdi basty borysh sanaıtyndyqtaryn da ortaǵa saldy.
Kúmisjan BAIJAN, Almaty oblysy.
Eginjaıda ótken semınar-keńes. Qordaı aýdanynda ótken «Eginjaı - 2011» oblystyq semınar-keńesi sheńberinde aýyl sharýashylyǵy salasyna arnalǵan quny 10 mln. AQSh dollary turatyn jańa tehnıkalardyń tusaýkeseri boldy. Aldaǵy ýaqytta olar sharýa qojalyqtarynyń maqsat-múddesine paıdalanylady. Semınar-keńeste tamshylatyp sýarý júıesi men aýyl sharýashylyǵy ónimderin qaıta óńdeýge arnalǵan zamanaýı qondyrǵylar da jurt nazaryna usynyldy. Mıneraldy jáne nóldik tehnologııa boıynsha sý únemdeý tájirıbesi de qoldaý tapty. Mamandar muny ońtústikte alǵash ret óndiriske engizilip otyrǵan shara dep baǵalady. Eginjaı basynda ótken semınar-keńeske jeke sharýashylyq qojaıyndarymen birge, oblys ákimi Q. Bozymbaev, Qazaq sý sharýashylyǵy ǵylymı-zertteý ınstıtýtynyń, Qazaq egin sharýashylyǵy jáne ósimdik sharýashylyǵy ǵylymı-zertteý ortalyǵynyń ǵalymdary men mamandary, «UBH Qazagro» AQ qarjy ınstıtýttarynyń oblystaǵy ókildikteriniń jáne basqa da qarjylyq ınstıtýttarynyń jetekshileri men mamandary qatysty.
Kósemáli SÁTTIBAIULY, Jambyl oblysy.
Aýyldyń 130 jyldyǵy atalyp ótti. Jaz aılarynda aýylda toı kóbeıedi. Sonyń biri – Meńdiǵara aýdanynda ótti. Aýdan ortalyǵy Borovskoe aýylyna 130 jyl toldy. Toı osyndaǵy «Ana men bala» alleıasynyń saltanatty ashylýynan bastaldy. «Qazaqstan Táýelsizdiginiń 20 jyldyǵyna ana men balaǵa arnalǵan 20 gúlzar men alleıalar!» degen respýblıkalyq aksııany qoldaǵan aýdanda sábıin qushaqtap turǵan kımeshekti ájeniń músini turǵyzyldy. Onyń aınalasy kógaldandyryldy, balalardyń oıyn alańy jasaldy. Aýyldyń toıynda at báıgesi ótkizildi. Mıhaılov aýylynyń turǵyny Bolat Qurmenbaev baptaǵan Vevera degen sáıgúlik 15 shaqyrymnan shashasyna shań juqtyrmaı keldi. Merekeni «Meńdiǵara dostardy qarsy alady» degen retro án festıvali aıaqtady.
Názıra JÁRIMBETOVA, Qostanaı oblysy, Meńdiǵara aýdany.
Qos merekege arnalǵan aıtys. Jýyrda Besqaraǵaı aýdanynda el Táýelsizdiginiń jáne Elbasy Jarlyǵymen Semeı atom polıgonynyń jabylǵanyna 20 jyl tolýyna oraı aıtys aqyndarynyń respýblıkalyq saıysy ótkizildi. Oǵan esimderi jyrsúıer qaýymǵa keńinen tanymal Rınat Zaıtov, Aıtaqyn Bulǵaqov, Maqsat Aqanov, Serikzat Dúısenǵazın, Farhat Maratuly, Ásem Erejeqyzy, Nurjan О́mirbaev syndy belgili aıtysker aqyndar qatysty. Kásibı joǵary dárejede ótken aıtysqa osy óńirdiń týmasy, Almatydaǵy «Menaý áje» qorynyń bas dırektory Maqsut Omarhanov demeýshilik jasady. Uıymdastyrý sharalarynan aýdandyq ákimshilik te syrt qalǵan joq. Qos merekege arnalǵan mazmundy aıtystyń bas júldesin almatylyq Farhat Maratuly ıelendi.
Dáýlet SEISENULY, Shyǵys Qazaqstan oblysy.
Úzdik taýarlar kórmesi. N.Pogodın atyndaǵy orys drama teatrynda «Qazaqstannyń úzdik taýarlary» óńirlik baıqaý-kórmesi uıymdastyryldy. Ol Táýelsizdiktiń 20 jyldyǵyna arnaldy. Oǵan shaǵyn bıznesti damytýǵa óz úlesterin qosyp júrgen 40-tan astam jeke kásipkerler men zańdy tulǵalar qatysyp, «О́ndiristik maqsattaǵy úzdik taýarlar», «Halyq tutynatyn úzdik taýarlar», «Úzdik azyq-túlik taýarlary» atalymdary boıynsha baq synasty. Kórmeni oblys ákimi Serik Bilálov aralap kórip, jergilikti jerlerde óndiriletin azyq-túlik ónimderi men buıymdarynyń moldyǵyna nazar aýdardy. Arnaıy qurylǵan komıssııanyń tańdaýyna úsh atalym boıynsha jeńimpaz atanǵan 9 kásipker ilikti. Endi olar respýblıkalyq baıqaýda oblys namysyn qorǵaıtyn bolady.
О́mir ESQALI, Petropavl.
