Júldegerlerdi marapattaý jıynynda sóz alǵan «Qazaqstan» RTRK» AQ basqarma tóraǵasy Erlan Qarın baıqaýdyń mańyzy men mánine toqtaldy. Jýrnalıstıka men ádebıettiń damý jolynda jańashyl da tereń shyǵarmashylyq jańalyqtarymen serpilis ákelgen Saǵat Áshimbaevtyń kózqaras kemeldigi týraly aıtyp ótti.
– Alash kósemi Álıhannyń «Ultqa qyzmet etý bilimnen emes, minezden» degeni bar. Saǵat Áshimbaev – ózindik stılimen ǵana emes, azamattyq pozısııasymen erekshelenetin tulǵa. Jeltoqsan oqıǵasy kezinde de qundy derekterdiń saqtalýyna túrtki boldy. Ulttyq arna Áshimbaevtar áýletine qaryzdar. Saǵat Áshimbaev atyndaǵy stıpendııaǵa ıe bolý – úlken jaýapkershilik, – degen basqarma basshysy baıqaýdyń ary qaraı da jalǵasa beretindigin jetkizdi.
Al jazýshy Aldan Smaıyl Saǵat Áshimbaevtyń azamattyq bolmysy men qaıratkerlik ustanymy týraly sóz qozǵady. – Saǵattyń úlken bir erligi – Keńes Odaǵy tusynda «Qaýyshý» habaryn efırge shyǵardy. Qazaqstannan jyraqta turatyn qandastarymyzdyń taǵdyryna arnalǵan alǵashqy habar bolatyn. Ol kezde «shettegi qazaqtardy elge oraltý kerek» degen sózdi aıtý – erlikpen para-par dúnıe. Aıtyp qana qoımaı, qazaqtar tyǵyz ornalasqan aımaqtarǵa baryp, ártúrli telesaparlar uıymdastyra bastady. Alǵashqy habary Ombyda ótti. Ánshi-kúıshilerdi, óner qaıratkerlerin alyp baryp, sol jaqtaǵy qazaqtardyń rýhyn kóterdi.
Jalpy, Saǵat Áshimbaev atyndaǵy baıqaýǵa respýblıka boıynsha 18 ýnıversıtettiń 33 stýdenti jumystaryn usynǵan. Saralaý komıssııasy qataryndaǵy «Qazaqstan» RTRK AQ Efırlik saıasat dıreksııasynyń bas redaktory Qaınar Oljaev, televızııa salasynyń ardageri Nurtileý Imanǵalıuly, «Qazaqstan Respýblıkasy Prezıdentiniń teleradıokesheni» KEQ prezıdenti Erlan Bekhojın, «Qazaqstan» RTRK» AQ Aımaqtyq habar taratýdy damytý dıreksııasynyń dırektory Erjanar Ásheıhan, «Kelbet», «Jarqyn beıne» baǵdarlamalarynyń prodıýseri, aqyn Jańyl Asylbekovalar arnaıy Astana-Almaty vıdeo konferensııasyn ótkizip, jeńimpazdy anyqtaý úshin stýdentterdiń jumystaryn sarapqa salǵan bolatyn. Nátıjesinde, ál-Farabı atyndaǵy Qazaq Ulttyq ýnıversıtetiniń jýrnalıstıka fakýltetiniń 1 kýrs stýdenti Dastan Qastaıdyń jumysy úzdik dep tanyldy.
Sharanyń qurmetti qonaǵy, Parlament Májilisi Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev júldeger stýdentke S.Áshimbaev atyndaǵy stıpendııany saltanatty túrde tabystap, quttyqtady. Baıqaýdy uıymdastyrýǵa bastamashy bolǵan korporasııa basshysy Erlan Qarın myrzaǵa alǵys bildirip, ákesi týraly jyly esteligimen bólisti.
«Ákemiz ómirden ozǵanda nebári 44 jasta boldy. Tiri bolǵanda búgin 70 jasqa tolar edi. 44 jas degen ómirdiń bet alysyn endi túsinip, sharýany jańa bastaǵan azamattyń jasy ǵoı. Dese de ákemiz sanaly ǵumyryn elge, halyqqa, ultqa qyzmet etýge arnady. Sekseninshi jyldardyń basynda «Júrekten qozǵaıyq» atty birneshe jylǵa sozylǵan serııalyq baǵdarlama júrgizdi. О́zi teledıdarǵa qyzmetke kelgen soń, osy habarlardyń ózektes zańdy jalǵasy retinde «Paryz ben qaryz» atty avtorlyq baǵdarlama engizip, ony birneshe jyl turaqty túrde júrgizip otyrdy. Munyń barlyǵy óz kezinde halyq tarapynan qoshametke ıe bolyp, joǵary baǵalandy. Jastar bolashaǵyna jol ashar osyndaı jobany júzege asyryp otyrǵan «Qazaqstan» RTRK AQ ujymyna erekshe alǵys bildiremin», dedi Máýlen Áshimbaev.
Aıa О́MIRTAI, «Egemen Qazaqstan»
Sýretke túsirgen Erlan Omarov
