Áleýmettik mańyzy bar isterdiń sanatyna, osy tańdaǵy ózekti máselelerdiń biri – alıment óndirý týraly atqarýshylyq qujattar jatady.
Osyǵan oraı, 2015 jyldyń 29 qazanynda №376-V sandy Qazaqstan Respýblıkasynyń Zańymen 2016 jyldyń 1 qańtarynan bastap qoldanysqa berilgen «Atqarýshylyq is júrgizý jáne sot oryndaýshylarynyń mártebesi týraly» Zańǵa ózgerister men tolyqtyrýlar engizildi.
Zańnyń 138-babyna sáıkes, jeke sot oryndaýshylarynyń quzyretine memlekettiń múddesi qozǵalǵan atqarýshylyq qujattardan basqa, jeke jáne zańdy tulǵalarǵa qatysty, sonymen qatar, áleýmettik mańyzy bar ister boıynsha barlyq atqarýshylyq qujattardy oryndaý jatady. Sonyń ishinde, alıment óndirý týraly atqarýshylyq qujattar da bar. Sondaı-aq, áleýmettik mańyzy bar ister boıynsha jeke sot oryndaýshylary tarapynan jeke tulǵalarǵa memleket kepildik bergen tegin zań kómegi kórsetiledi. Zańnyń 117-1-babyna sáıkes, áleýmettik mańyzy bar ister sanatyna jatatyn, sonymen qatar, alıment óndirý týraly atqarýshylyq qujattar boıynsha jeke sot oryndaýshysy qyzmetiniń aqysy bıýdjetten tólenedi.
Aýmaqtyq organǵa usynylǵan atqarýshylyq áreketterdi jasaǵany jáne óndirip alynǵan tólemder týraly esep jeke sot oryndaýshysynyń qyzmetine aqy tóleý úshin negiz bolyp tabylady. Jeke sot oryndaýshysynyń osy baptyń 1-tarmaǵynda kózdelgen atqarýshylyq qujattar boıynsha májbúrleý sharalaryn qoldanýǵa baılanysty qyzmetine aqy tóleý mólsherin Qazaqstan Respýblıkasynyń Úkimeti belgileıdi.
«Jeke sot oryndaýshysynyń alımentterdi jáne jalaqyny óndirip alý týraly atqarýshylyq qujattar boıynsha májbúrleý sharalaryn qoldanýyna baılanysty qyzmetine aqy tóleý mólsherin belgileý týraly» Qazaqstan Respýblıkasy Úkimetiniń 2015 jylǵy 24 jeltoqsandaǵy №1053 qaýlysyna sáıkes, jeke sot oryndaýshysynyń alımentterdi jáne jalaqyny óndirip alý týraly atqarýshylyq qujattar boıynsha májbúrleý sharalaryn qoldanýyna baılanysty qyzmetine aqy tóleý bir atqarýshylyq is júrgizýge 5 aılyq eseptik kórsetkish mólsherinde belgilengen.
Jeke sot oryndaýshylarymen, alıment tólemeı qashyp júrgen boryshkerlerge, Qazaqstan Respýblıkasynan shyǵýyn ýaqytsha shekteý, múlkin tárkilep qana qoımaı, Qazaqstan Respýbıkasynyń Ákimshilik quqyq buzýshylyq Zańynyń 669-babyna sáıkes, 10 AEK kóleminde aıyppul salýdan 5 táýlikke deıin qamaýǵa alý jáne de qylmystyq jaýapkershilikke tartý syndy sharalar qoldanylady.
Zere QARJAÝOVA,
Almaty qalalyq ádilet departamenti
jeke sot oryndaýshylar qyzmetin uıymdastyrý bóliminiń jaýapty mamany
