Osyndaı kúrdeli máselelerge arnalǵan aýqymdy jıyn «Mádenıetter toǵysy: qoldanbaly áleýmettik lıngvıstıka jáne shet tilderin oqytý máseleleri» degen taqyrypta elordadaǵy N.L.Gýmılev atyndaǵy Eýrazııa ulttyq ýnıversıtetinde ótken edi. Oǵan osy ýnıversıtettiń jalpy til bilimi jáne aýdarma teorııasy kafedrasy, S.Demırel ýnıversıtetiniń fılologııa jáne pedagogıka fakýlteti, Qazaq gýmanıtarlyq zań ýnıversıteti uıytqy boldy.
Halyqaralyq konferensııanyń negizgi maqsaty – tildi oqytýda teorııa men praktıkany ushtastyra bilý, zertteý nátıjelerin qoldanysqa engizýdi júıeli túrde iske asyrý bolyp sanalady. Tildi oqytý ádistemesi, qazirgi lıngvıstıka men ádebıettaný, kóp tildi bilim berý isi, tildi oqytýdaǵy ınnovasııalar men arnaıy maqsattarǵa baǵyttalǵan aǵylshyn tili, aýdarma jumysy jan-jaqty sarapqa salynǵan otyrysta AQSh-tyń Arızona, Mıchıgan ýnıversıtetiniń professorlary Paýl Keı Matsýda, Sýzan Kass, London koroldik kolledjiniń professory Ben Rampton jáne ózge de sheteldik ǵalymdar baıandama jasap, otandyq ǵalymdarmen tájirıbe almasty. Ásirese, kóptildilikti saqtaı otyryp, memlekettik tildi jetik meńgerý jáne bul jumysty jastar arasynda baıandy júrgizý jaıy jan-jaqty qozǵaldy. Jalpy sany 250-ge jýyq ǵylym salasynyń ókilderi qatysqan basqosýda qazaq tili men ózge tilderdi ushtastyra otyryp meńgerý ádistemesi saralandy.
Súleımen MÁMET,
«Egemen Qazaqstan»
