Baıqaýǵa «Ulytaý» tobynyń solısi Erjan Álimbetov bastaǵan dombyrashy Nurken Áshirov, shertpe kúıshi Qaırat Aıtbaev, shejireshi Ramazan Nurǵalıev, Jaıaý Musa atyndaǵy Baıanaýyl balalar óner mektebiniń halyq aspaptar bóliminiń ustazy Ernat Motyshevtar qazylyq etti.
Baıqaýdyń ashylý saltanatynda aýdan ákimi Orazgeldi Qaıyrgeldınov sóz sóılep, qazaqtyń otbasynda dombyra ustap án salmaıtyn, kúı kúmbirletpeıtin bala joq ekenin alǵa tartyp, úmitterin úkilegen ónerli órenderge sáttilik tiledi.
Baıqaýdyń bir ereksheligi, eki kezeńnen turǵan Qurmanǵazynyń «Mashına», «Balqaımaq», Táttimbettiń «Sylqyldaq», Dınanyń «Segizinshi mart», R.Omarovtyń «Jastyq shaq», M.Hamzınniń «Belgisiz soldat» kúıleri jıi oryndaldy. Baıqaý úsh jas ereksheligi boıynsha baǵalandy. Ár ónerpaz óz álinshe sheberligin tanytty. О́nerli urpaqtary barda elimiz rýhanı damý jolyna túse alatynyn baıqadyq. Ata-baba jolyn jalǵap, ulttyq ónerin qudiret kórgen balaýsa býyn ul-qyzdarymyzǵa búkil kórermen rıza boldy.
Baıqaý qorytyndysynda Baıanaýyl aýdanynyń ákimi Orazgeldi Qaıyrgeldınov tabystaǵan bas júlde Shyǵys Qazaqstan oblysy Abaı aýdany Jánibek Kármenov atyndaǵy mýzyka mektebiniń oqýshysy Esbol Hapanǵa buıyrdy.
Halyq ártisi Maǵaýııa Hamzın atyndaǵy arnaıy júldeni orta topta óner kórsetken pavlodarlyq Áıgerim Orazbaı ıelense, «Tókpe kúıde óz sheberligin kórsetkeni úshin arnaıy júlde» semeılik Nurjan Nurlanǵa tabys etildi.
Sóıtip, Baıanaýyl halqy balǵyn talanttar shertken tamasha kúılerdi tyńdap, tańdanysyp, kúmbirlegen dombyra únimen qımaı qoshtasty. San ǵasyrlyq tarıhy bar ultymyzdyń uly óneri ǵasyrlar qoınaýyna engen saıyn qudireti artyp, aıshyqtalyp keledi. Elimizdegi mýzykalyq jáne óner mektepteri arasynda ótken osy «Kúı-Qudiret» baıqaýy sonyń aıqyn kórinisi.
Elaman QABDILÁShIM
Pavlodar oblysy,
Baıanaýyl aýdany
