Elordadaǵy sharanyń ashylý saltanatynda Ulttyq mýzeıdiń dırektory mindetin atqarýshy Abaı Satybaldın: «Ulttyq mýzeıde bıyl úshinshi márte «Mýzeıdegi tún» aksııasy ótkizildi. Oǵan kelýshilerdiń qyzyǵýshylyǵy da jyl sanap artyp keledi. «Mýzeıdegi tún» aksııasyn uıymdastyrý arqyly halyqtyń tól mádenıetimizge degen súıispenshiligin arttyryp, ulttyq qundylyqtarymyzǵa degen qurmetin molaıta alamyz», dedi.
Shara barysynda tanymdyq baǵyttaǵy taqyryptyq ekskýrsııalar, «Asyq atý», «Arqan tartys», «Qol kúres» syndy sporttyq oıyndar uıymdastyrylyp, bıe baılaý naýqany bastalarda jasalatyn «Qymyzmuryndyq» rásiminen kórinister kórsetildi. Mýzeı atrıýmynda zergerlik buıymdar men kádesyılar satylymǵa qoıylǵan jármeńke uıymdastyryldy.
Taǵy bir aıta ketetin jaıt, aksııa aıasynda akademık Tóregeldi Sharmanov basqaratyn Qazaq taǵamtaný akademııasynyń ázirleýimen bıe sútinen daıyndalǵan shokoladtyń tanystyrylymy ótti.
«Mýzeıdegi túnge» kelýshilerdiń nazaryna óner juldyzdary Gúlnur Orazymbetova, Muhametálı Júginisov, Rınat Malsagov, Shaharızat Seıdahmet qatysqan konserttik baǵdarlama usynyldy.
Kelýshilerdiń barlyǵy da tyń jobaǵa oń baǵasyn berdi. Álemdik deńgeıde atalyp ótetin bul aksııanyń Ulttyq mýzeıde de uıymdastyrylýy bizdi erekshe qýantty deıdi qonaqtar. Turǵyndardy, ásirese, mundaǵy Altyn, Zamanaýı óner jáne Astana zaldaryndaǵy qundylyqtar baýrap aldy.
Ulttyq mýzeı ashylǵaly beri «Mýzeıdegi tún» aksııasy osymen úshinshi márte ótkizilip otyr. 2015 jylǵy alǵashqy aksııaǵa 23 myń adam qatyssa, byltyr oǵan kelýshiler sany 30 myńnan asqan. Naýryz merekesine oraı uıymdastyrylǵan «Naýryz – jańǵyrý nyshany» jobasyna da astanalyqtar men qonaqtar tarapynan osyndaı belsendilik baıqalǵan edi. Endi, mine, bıyl olardyń sany edáýir artyp, «Mýzeıdegi tún» sharasyn 37 myńǵa jýyq adam tamashalapty. Mundaı jetistikke mýzeı ulttyq tyń jobalarmen tolyǵýy nátıjesinde qol jetkizip otyr.
Qarshyǵa KÚLEN
