«Qazaqstan Táýelsizdigi jáne Elbasy» konkýrsy qorytyndylanady

Ortalyq kommýnıkasııalar qyzmetinde Qazaqstan Respýblıkasynyń Tuńǵysh Prezıdenti – Elbasynyń kitaphanasy jáne Memleket tarıhy ınstıtýty birlese uıymdastyrǵan «Birlik pen jasampazdyqtyń 25 jyly» halyqaralyq ǵylymı-tájirıbelik konferensııasyna arnalǵan brıfıng ótti. Sharaǵa Qazaqstan Respýblıkasynyń Tuńǵysh Prezıdenti – Elbasy kitaphanasynyń atqarýshy dırektory Beısembaı Jumabekov, Belarýs ulttyq ǵylym akademııasy Tarıh ınstıtýty dırektory, t.ǵ.k., dosent Vıacheslav Danılovıch, Bashqurtstan memlekettik ýnıversıteti tarıhnama jáne derektaný kafedrasynyń meńgerýshisi, t.ǵ.d., professor Roza Býkanova, Kolýmbııa ýnıversıtetiniń adıýnkt-professory Rafıs Abazov jáne Memleket tarıhy ınstıtýtynyń dırektory Búrkitbaı Aıaǵan qatysty. B. Jumabekov el Táýelsizdiginiń 25 jyldyǵyna oraı Elbasy kitaphanasynda 28 qarashada bastalǵan «Ashyq esik kúnderi» jyl sońyna deıin jalǵasatynyn aıtty. «Elbasy kitaphanasynda 100-den astam biregeı muraǵat materıaldarynyń, 550 tarıhı kitaptardyń 8 kórmesin tamashalaýǵa bolady. Dúısenbi kúni buqaralyq aqparat quraldary arasynda jarııalanǵan «Qazaqstan Táýelsizdigi jáne Elbasy» respýblıkalyq konkýrsynyń jeńimpazdary marapattalady. Oǵan elimizdiń jetistikteri, Memleket basshysynyń bastamalary men ıdeıalary jaıly qalam terbegen 111 avtor 365 jumysyn joldady», – dedi kitaphananyń atqarýshy dırektory. Sondaı-aq ol «Birlik pen jasampazdyqtyń 25 jyly» halyqaralyq ǵylymı-tájirıbelik konferensııasynda talqylanyp jatqan ózekti taqyryptarǵa toqtalyp ótti. «Konferensııanyń otandyq jáne sheteldik qatysýshylary Qazaqstan Respýblıkasy Tuńǵysh Prezıdentiniń memlekettilikti qalyptastyrý men nyǵaıtýdaǵy róli, ulttyq ekonomıkany jańǵyrtý nátıjeleri men basymdyqtary, ǵylymı-ınnovasııalyq salanyń jetistikteri men basymdyqtary jaıly ózara pikir almasyp, Qazaqstandaǵy Prezıdenttik ınstıtýt, etnosaralyq toleranttylyq pen qoǵamdyq kelisimniń qazaqstandyq modeli máselelerin keńinen talqyǵa saldy», – dep atap ótti B. Jumabekov. Aıdar О́RISBAEV, "Egemen Qazaqstan".