Senat memlekettik qyzmet týraly zańdy maquldady

Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasyn maquldady, dep habarlaıdy QazAqparat. «Birinshiden, jańa zań boıynsha memlekettik organda laýazym bosasa,eń aldymen sol memorgannyń arasynda irikteý júrgiziledi. Eger olardyń ishinen úmitker bolmaǵan jaǵdaıda, irikteý barlyq organ qyzmetkerleri arasynda jalǵastyrylady. Osy kezeńde de jeńimpaz anyqtalmasa, onda jalpy konkýrs jarııalanady»,-dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov zań jobasy boıynsha baıandama jasaý barysynda. Onyń sózine qaraǵanda, jyl basynan qoldanysqa engen zańdy taldaý kórsetkendeı, bos laýazymdarǵa úmitkerlerdi irikteýtiń konkýrstary 16-dan 52 jumys kúnine deıin ýaqyt alýda. Bul jaǵdaı óz kezeginde kadr tapshylyǵyna alyp kelýde, ásirese, aýyldyq jáne aýdandyq deńgeılerde kadr jetispeýshiligi anyq baıqalýda. Ásirese, sırek  kezdesetin mamandyqtarǵa qyzmetke turý jeńildetilmek. Osy rette ekinshi ishki jáne jalpy konkýrstardy biriktirý olardy tezirek jabýǵa múmkindik beredi. Bos oryndar toltyrý máselesin tezdetýmen qatar, merıtokratııa qaǵıdalarynyń saqtalýy baqylaýda bolady. Sol sebepti ekinshi ishki konkýrstar ótkizilmeıtin jaǵdaılar zańǵa táýeldi quqyqtyq aktilerinde anyqtalatyn bolady. Olar sırek kezdesetin mamandyqtar jáne basshylyq emes laýazymdar. Kerisinshe, barlyq basshylyq laýazymdarǵa ekinshi konkýrsty ótkizý mindetti túrde saqtalady. Bundaı tásil tómennen joǵaryǵy ósýdi, ıaǵnı mansaptyq qaǵıdanyń talaptaryn oryndaýdy tolyq qamtamasyz etedi. Budan bólek ol «A» korpýsy qyzmetkerleriniń «B» korpýsy laýazymdaryna taǵaıyndalý tártibi jeńildetiletinin ańǵartty.  Qazirde «A» korpýsynyń qyzmetkerlerin tómengi orynǵa taǵaıyndaý tek Kadr saıasaty jónindegi ulttyq komıssııanyń sheshimimen ǵana júzege asyrylady. Zań jobasymen mundaı quqyqty agenttikke berý usynylyp otyr.