Astanada Elbasynyń qatysýymen festıval ótip jatyr

Astanadaǵy «Saryarqa» velotreginde Táýelsizdiktiń 25 jyldyǵyna oraı uıymdastyrylǵan Qazaqstan halqy Assambleıasy etnomádenı birlestikteriniń «Beıbitshilik pen kelisimniń 25 jyly» festıvali ótip jatyr. Saltanatty sharany Memleket basshysy Nursultan Nazarbaev ashty. Sharany resmı ashý saltanatynda Elbasy Táýelsizdiktiń eń basty tiregi retinde beıbitshilik pen kelisim, tynyshtyq pen turaqtylyqty atap ótti. «Barshańyzdy Táýelsizdiktiń 25 jyldyǵyna arnalǵan búgingi forýmnyń ashylýymen shyn júrekten quttyqtaımyn. Osy jerge Qazaqstannyń barlyq óńirinen etnomádenı birlestikterdiń ókilderi kelip otyr. Júreginde patrıottyq sezimi, boıynda jastyq qýaty tasyǵan jastar jınalyp otyr. Táýelsizdiktiń eń basty tiregi – beıbitshilik pen kelisim, tynyshtyq pen turaqtylyq. Osynyń arqasynda biz 25 jylda memleket qurdyq. Deńgeıin kóterdik. Halyqtyń ál-aýqatyn joǵarylattyq. Bizdiń tilegimiz bir, júregimiz bir, bilegimiz bir. Bizdiń taǵdyrymyz, otanymyz ortaq. Máńgilik elimizdiń gúldene berýine birge eńbek etemiz. Osy jolda barshańyzǵa zor tabys tileımin», - dedi Elbasy. Is-sharaǵa Parlament depýtattary, shet memleketterdiń dıplomatııalyq ókildikteri, JOO-nyń rektorlary, qoǵam qaıratkerleri, zııaly qaýym men stýdentter qaýymy, Assambleıa músheleri men ardagerleri, barlyq óńirlerden kelgen respýblıkalyq jáne óńirlik etnomádenı birlestikterdiń jetekshileri men belsendileri qatysýda. Sýretti túsirgen Erlan Omarov, "Egemen Qazaqstan".