Medaldar tapsyryldy

Almatydaǵy «Dostyq» úıinde Qazaqstan Táýelsizdigi merekesi qurmetine oraı Qazaqstan halqy Assambleıasynyń músheleri men osyndaǵy etnomádenı birlestikter ókilderi, shyǵarmashyl jáne ǵylymı zııaly qaýym ókilderi marapattaldy. Qazaqstan Respýblıkasy memlekettiliginiń qalyptasýyna, egemendiginiń nyǵaıýy men áleýmettik-ekonomıkalyq damýyna qosqan úlesi úshin Halyqaralyq «Qazaq tili» qoǵamdyq birlestiginiń prezıdenti О́mirzaq Aıtbaıuly, «Vaınah» cheshen jáne ıngýsh halyqtarynyń mádenıetin damytý qaýymdastyǵy» qoǵamdyq birlestiginiń teń tóraǵasy Sultan Ozdoev, Qazaqstan halqy Assambleıasy Ǵylymı-sarapshylyq keńesiniń múshesi Dos Kóshim jáne basqa da, barlyǵy 30 adam «Qazaqstan Respýblıkasy Táýelsizdigine – 25 jyl» mereıtoılyq medalin keýdesine taqty. Qazaqstan halqy Assambleıasy Keńesiniń sheshimimen bir top azamatqa Qazaqstan Respýblıkasy Táýelsizdigi men el birligin nyǵaıtýǵa, mádenıetaralyq qarym-qatynasty damytýǵa, qazaqstandyq patrıotızmdi qalyptastyrýǵa qosqan eleýli úlesi úshin «Qazaqstan halqy Assambleıasynyń «Birlik» altyn medali» qoǵamdyq medali tapsyryldy. Marapatqa ıe bolǵan Qazaqstan halqy Assambleıasynyń músheleri men osyndaǵy etnomádenı birlestikter ókilderiniń arasynda belgili saıasatker, qoǵam qaıratkeri Aıdos Sarym, temirjolshy Aıjan Ospanova, televızııa qyzmetkerleri Erjan Qaraq, Dana Baqtyǵalıeva jáne basqalar bar. Qazaqstan Respýblıkasynyń Prezıdenti, Qazaqstan halqy Assambleıasynyń Tóraǵasy Nursultan Nazarbaev qol qoıǵan nagradalardy marapat ıelerine QHA Tóraǵasynyń orynbasary Eraly Toǵjanov tabys etti. Is-sharaǵa qalalyq máslıhat depýtattary, QHA músheleri, memlekettik organdardyń, etnomádenı birlestikterdiń ókilderi, qoǵam qaıratkerleri, ǵylymı jáne shyǵarmashyl zııaly qaýym ókilderi qatysty. Talǵat SÚIINBAI, «Egemen Qazaqstan» ALMATY