El Táýelsizdiginiń shırek ǵasyrlyq mereıtoıyn atap ótetin kún jaqyndaǵan saıyn aımaqtardaǵy jarqyn eńbek pen aıtýǵa turarlyq oqıǵalardyń kórinisine toly sharalar legi de arta túsýde. Bul – óńirdegi óndiristiń ilgerileýi men eńbek ónimdiliginiń aıqyn mysaly. «Egemen Qazaqstannyń» menshikti tilshileri berekeli óńirdegi merekelik kóńil-kúıdiń naǵyz ortasynda júrgendikten, aımaqtardaǵy aıtýly isterdiń jarqyn nátıjesine kýá bolyp keledi. О́ńirler tynysynyń bir sátin «Táýelsizdik tartýy» aıdarymen toptap berýdi jón kórdik.
Aqmola oblysynan – Baqbergen AMALBEK:
Stepnogor qalasynda shaǵyn munaı óńdeý zaýyty iske qosyldy. «Neftıanoı Dom Astana-Oıl» jaýapkershiligi shekteýli seriktestigine qarasty kásiporyn oblysta tuńǵysh ret joǵary sapaly dızel otynyn shyǵara bastaıdy. Bıylǵy merekeli jylda seriktestik óndirilgen ónimniń ózindik qunyn arzandatý jáne onyń sapasyn jaqsartý maqsatynda 1,5 mıllıard teńgeniń ınvestısııalyq jobasyn oıdaǵydaı júzege asyryp shyqty. Aqmola oblysynyń kásipkerlikti damytý kartasyna engizilgen aıryqsha joba jylyna 150 myń tonna ónim óndirýge múmkindik beredi. Munaı eýrostandarttar talabyna jaýap beretin ozyq ınnovasııalyq tehnologııamen óńdeledi. «Neftıanoı Dom Astana-Oıl» JShS basshylarynyń aıtýynsha, óńirdiń dızel otynyna jyldyq suranysy 400 myń tonna bolsa, munyń 150 myń tonnasy Stepnogordaǵy kásiporynda óndiriletin bolady. Sondaı-aq, shaǵyn zaýyttyń ashylýyna baılanysty qosymsha 15 jumys orny qurylyp otyr. Kásiporynnyń quryltaıshysy Vladımır Grıshenko kásiporynnyń tehnologııalyq jabdyqtalýyna, túpki ónimniń sapasyna sıpattama bere kele, «Neftıanoı Dom Astana-Oıl» JShS jolaýshylarǵa tıimdi baǵamen óz maı quıý stansasyn ashýdy josparlap otyrǵanyn aıtty.Qaraǵandy oblysynan – Qaırat ÁBILDINOV:
Qaraǵandy oblysynyń Saryshaǵan eldi mekeninde jańa temir jol vokzaly ashyldy. Munan bólek «Nurly jol» baǵdarlamasy aıasynda Saryshaǵan kentinde ústimizdegi jyly dárigerlik ambýlatorııa men mádenıet oshaqtaryna jóndeý jumystary júrgizilgen bolatyn. Osyndaı ınfraqurylymdy damytý baǵdarlamasy sheńberinde endi jańa temir jol paıdalanýǵa berildi. – Qos qabatty jańa nysanda jolaýshylarǵa kerek jaǵdaıdyń bári de jasalǵan, – deıdi stansa bastyǵy M.Qonysbaev. – Ana men balaǵa arnalǵan demalys bólmesi, jolaýshylar zaly, ashanasy bar, kompıýterlik zal qyzmet kórsetedi. Sondaı-aq, poıyzdardyń kelip-ketetin ýaqytyn kórsetip turatyn zamanaýı elektrondy taqta ornatylǵan. Nysan bir mezette 1500 jolaýshyǵa qyzmet kórsete alady. El Táýelsizdiginiń shırek ǵasyrlyq mereıtoıy qarsańynda ashylǵan jańa vokzal saryshaǵandyqtar úshin tamasha merekelik tartý boldy.Qostanaı oblysynan – Názıra JÁRIMBETOVA:
«Qostanaı oblysynda eldi mekenderdi gazdandyrý jáne gaz taratý jelisin jańǵyrtý» ınvestısııalyq jobasynyń ulttyq operatory «QazTransGaz» aksıonerlik qoǵamy Rýdnyı qalasynyń Kachar kentine gaz qubyryn kirgizý jumystaryn aıaqtady. Munda avtomattandyrylǵan gaz taratý stansasy, gaz retteý blogy beketi salynyp, 30 shaqyrym qubyr júrgizildi. Kógildir otyn kenttegi 56 iri paneldi turǵyn úılerge, jıyrma shaqty jeke úılerge jáne 35 irili-usaqty kommýnaldyq-áleýmettik nysandar ornalasqan ǵımarattarǵa kirgizildi. Sonyń arqasynda Kachardyń 12 myń halqy qolyn jyly sýǵa malyp, órkenıet jemisiniń rahatyn kórip otyr. Qostanaı óńirin gazdandyrý jumysy úzilissiz júrgizilip keledi. Sońǵy eki jylda oblys óńirinde 600 shaqyrym gaz qubyry tartyldy, 50 myń turǵyny bar 8 eldi meken – Áýlıekól aýdanyndaǵy Áýlıekól, Amanqaraǵaı aýyldary, Rýdnyıdyń Kachar kenti, Qarabalyq aýdanyndaǵy Toǵyzaq stansasy, Denısov aýdanyndaǵy Antonov, Alchanov selolary, Lısakov qalasyna qarasty Oktıabr poselkesi jáne Fedorov aýdanynyń ortalyǵy kógildir otynnyń rahatyn kórip otyr. Oblys turǵyndarynyń tabıǵı gazǵa qoly jetip, paıdalanýy 10 paıyzǵa artty. Bul jumystar ınvestısııalyq jobalar aıasynda aldaǵy ýaqytta da jalǵasyn tabatyn bolady.Jambyl oblysynan – Oralhan DÁÝIT:
Irandyq ınvestorlar polıetılen qubyrlar shyǵarýdy qolǵa almaq. Atalǵan jobany júzege asyrý úshin arnaıy kelisimshart ta jasaldy. Irandyq ınvestorlar Jambyl oblysynyń ekonomıkalyq múmkindikterimen tanysýǵa arnaıy kelipti. Olar aldymen ınvestısııa salýǵa suranyp turǵan birqatar jobalarmen tanysyp, sonyń ishinde dıametri 3 sm-den 3 metrge deıin jetetin polıetılen qubyrlaryn shyǵarýǵa arnalǵan kásiporyn ashýǵa nıetti ekendikterin jetkizdi. Mundaǵy basty erekshelik – qubyrlardyń quramyna shyny aralastyrylady. Ol tózimdiligimen erekshelenbek. Kishkentaı kólemdi qubyrlar jylyjaılarda paıdalanylady. Al úlken qubyrlar qurylysqa qolaıly. – Investısııa salý úshin Jambyl oblysyna delegasııamyzben ekinshi ret keldik. Aımaqtyń múmkindikteri óte mol eken. Ásirese, bul aımaq aýyl sharýashylyǵy úshin óte qolaıly. Máselen, biz qolǵa alyp otyrǵan polıetılen qubyrlar tamshylatyp sýarý tehnologııasy úshin óte qajet. Budan bólek, mal sharýashylyǵy, onyń ishinde et eksportyn arttyrýǵa kómekteskimiz keledi. Irannan ákelgen arnaıy qurylǵylar arqyly etti vakýýmdaýǵa bolady. Etti vakýýmdaý arqyly ony 72 saǵat ishinde álemniń kez kelgen jerine tasymaldaýǵa múmkindik bar, – deıdi ırandyq ınvestor Hosseın Hasan Komalı.Pavlodar oblysynan – Farıda BYQAI:
Oblys ortalyǵyndaǵy «Saryarqa» shaǵyn aýdanynda taǵy da bir jańa úı boı kóterdi. Bul joly jarqyraǵan jańa shaǵyn aýdanda 4 turǵyn úı paıdalanýǵa berildi. Páter alǵandar burynǵy «Alıýmınstroı» shaǵyn aýdanynyń burynǵy turǵyndary qalada 50-shi jyldary salynǵan eki qabatty apatty úılerde turyp keldi. Osynyń aldynda ǵana «Saryarqa» shaǵyn aýdanyndaǵy Lomov kóshesinde 12 qabatty bıik úı paıdalanýǵa berilgen edi. Pavlodar qalasynyń ákimi Nurjan Áshimbetovtiń aıtýynsha, bul aýdandaǵy qalǵan eski úıler de aldaǵy ýaqytta súrilip, sodan soń jańa úıler boı kóteredi. Bıyl jazda «Saryarqa» turǵyn úı kesheniniń alǵashqy kezeńi paıdalanýǵa berilip, jańa páter kiltin 105 otbasy alsa, Sh.Shókın kóshesinde ornalasqan taǵy bir jańa úıden 52 otbasy páter aldy. Al aldaǵy jyldary oblys ortalyǵynda 22 jańa úı salynady dep josparlanýda. Jeltoqsan aıynda 9 úı kesheni paıdalanýǵa berilip, 900 otbasy jańa páter alady.Shyǵys Qazaqstan oblysynan – Dýman ANASh:
Elimizdegi shekaralyq óńirlerdiń biri sanalatyn Tarbaǵataı aýdany Táýelsizdiktiń 25 jyldyq mereıtoıyn joǵary tabystarmen qarsy alyp otyr. Aýdannyń áleýmettik-ekonomıkalyq kórsetkishterinde oń ózgerister kóp. Sonyń biri – árıne, mal sharýashylyǵy. Aıta ketelik, aýdanda 150 myńǵa jýyq iri qara, 450 myńǵa jýyq qoı-eshki jáne 25 myńdaı jylqy bar. Sońǵy 3 jyl kóleminde 60-qa jýyq asyl tuqymdy sharýashylyq jumys isteýde. Mal basyn túrlendirý boıynsha aýdan úshinshi jyl qatarynan respýblıkada birinshi oryndy ıelenip otyr. Qazirgi tańda 26 512 mal basy tuqym túrlendirýge qatysýda. – Elbasy barlyq deńgeıdegi ákimderge aýyl turǵyndaryn jumyspen qamtý maqsatynda otbasylyq mal bordaqylaý alańdary men sút qabyldaıtyn tirek pýnktter ashý jóninde tapsyrmalar bergen bolatyn. Álbette, bir otbasy 5 bastan 50 basqa deıingi maldy bordaqylaı alady. Sondyqtan tarbaǵataılyqtar shaǵyn otbasylyq bordaqylaý alańyn ashýǵa birden bel sheshe kiristi. Qazir aýdanda 400-ge jýyq mal bordaqylaý alańy bar, – deıdi Tarbaǵataı aýdanynyń ákimi Dildábek Orazbaev.
