Endi Qostanaı oblystyq kóp profıldi jáne oblystyq balalar aýrýhanalary qytaılyq áriptesterimen tikeleı baılanysqa shyǵyp, keńester ala alady. Úrimshidegi 6-shy qalalyq aýrýhana onlaın baılanysta boldy.
Qytaı jaǵynan qala meriniń orynbasary jáne dárigerler qatysty. Al Qostanaıdan dárigerlermen birge oblystyq densaýlyq saqtaý basqarmasynyń ókilderi otyrdy. Qytaı jáne qazaqstandyq aýrýhanalar arasynda jaz aıynda Shanhaı yntymaqtastyq uıymy baǵdarlamasy sheńberinde kelisimge qol qoıylǵan bolatyn.
«Aldymen travmatologııa jáne ortopedııa salasy boıynsha qytaılarmen jumys isteımiz, sosyn medısınanyń basqa salalaryna kóshemiz. Bul kúrdeli jaǵdaılarda bizge naqty dıagnozdy anyqtaýǵa múmkindik beredi. Onlaın baılanys arqyly qytaılyq áriptesterge túsirilgen rentgen materıaldaryn, naýqasty tekserý qorytyndylaryn jáne pasıentti kórsetemiz» deıdi oblystyq balalar aýrýhanasynyń bas dárigeri Fazyl Temirhanov.
Al oblystyq aýrýhananyń bas dárigeri Vladımır Stelmah qytaılyq áriptestermen keńesý, alystan dıagnostıkanyń naqtylyǵyn anyqtaý naýqastardyń sapaly emdelýine jaǵdaı týǵyzatynyn aıtty.
Názıra Járimbetova
«Egemen Qazaqstan»
