Urylar jandarynda júr eken

Shymkenttiń bir top turǵyny óristegi maldarynyń ushty-kúıli joǵalyp kete beretindiginen polı­sııaǵa shaǵymdanǵan. Osyn­daı oqıǵalar jıilep ketkennen keıin Qarataý aýdandyq ishki ister bóliminiń tájirıbeli polıseı­lerinen jasaqtalǵan jedel-tergeý toby qurylyp, shuǵyl iske kirisedi. Mundaı shuǵyl top quryl­ǵanynan onshalyqty habary joq urylar qylmys ústinde qolǵa túsip qalady. Sóıtse, qanshama otbasynyń yryzdyǵyn jep, dandaısyp ketken urylar alystan kelmepti, mal urlanǵan aýyldyń eki turǵyny bolyp shyqqan. Bireýi 1982 jyly, ekinshisi 1998 jyly týǵan kúdiktiler esh jerde jumys istemeıdi eken. Jumys istemeıdi eken dep bireý bala-shaǵasyn baǵyp bermeıdi. Al eńbek etip nan tabýǵa ekeýiniń de onshalyqty qulqy joq. Sondyqtan qaýiptileý bolsa da urlyq joldy tańdapty. Polıseıler teksere kelgende urlyq qurylymy bir-aq izge qurylǵanyn anyqtaǵan. Tańer­teńgilik maldaryn óriske aıdap salatyn turǵyndar onyń sońynan sabylyp júretin qaraýyl qoımaıdy. Sondyqtan saýyn sıyrlar buzaýy úshin kelgenimen, sýy, oty mol jerden torpaq-tana, usaq mal kete qoımaıdy. Osynyń bárin oı ele­ginen ótkizgen ekeý quryǵyn qyltyńdatyp, júgenin syldyrlatyp degendeı, kóz baılanǵan shaqta óriske kele qalady. Kishigirim maldy qaýmalap ustap alyp, ýaqyt keń bolsa borshalap soıyp alady da mashınaǵa tıep taıyp turady. Qazir ne kóp, arzan etke alarman kóp. Qaıdan aldyń dep tergep jat­qan olar joq. Bazarda et satatyn qasap­shylar ońaı oljadan ólse aıyryla ma, taǵy ákel dep jalańdap turady. «Dánikken qarsaq qulaǵymen in qazady» degendeı, maly urlanǵan adamdardyń beıqamdyǵy men polıseılerdiń jaıbaraqattyǵyn paıdalanǵan ekeý, tipti tapa tal túste de óriske baryp, mal áke­tetindi shyǵarǵan. Keıin olardyń 18 mal urlyǵyna qatysy barlyǵy anyqtalǵan. Búginde olardyń ústinen Qyl­­mystyq kodekstiń 188-baby (Urlyq) boıynsha qylmystyq is qozǵalyp, qamaýǵa alyndy. Olardan urlanǵan maldan tús­ken aqshanyń bir bóligi qaı­ta­ryldy. Polıseıler mal ıe­le­rine qyraǵy bolýlaryn tapsy­ryp jatyr. Baqtııar TAIJAN, «Egemen Qazaqstan» Ońtústik Qazaqstan oblysy