ÝEFA 2015-2016 maýsymynyń qorytyndysy boıynsha «Fair Play» reıtıngin jarııalady. Munda 2015 jyldyń 1 mamyry men 30 maýsymy aralyǵynda oınaǵan quramalar men klýbtardyń oıyndary esepke alyndy. Bul týraly vesti.kz habarlady.
Jańa erejege boıynsha, onyń birneshe kórsetkishi shyǵaryldy. Jeńimpazdar úsh kategorııa boıynsha anyqtaldy. Olar – jankúıerler tártibi, maýsym úzdigi jáne jalpy «Fair Play» reıtıngisi.
Jankúıerler tártibi boıynsha Qazaqstan 8,617 upaı jınap, besinshi orynǵa jaıǵasty. Kósh basynda Estonııa, Islandııa, Norvegııa jáne Ýels quramalary tur. Bul kórsetkishte Qazaqstan Ispanııa, Anglııa, Fransııa jáne Germanııa elderinen basym tústi.
Qazaqstan úzdik bestikke «Fair Play» erejesin saqtap, qazaqstandyq fýtbolshylarǵa qoldaý kórsetken jankúıerlerdiń arqasynda endi.
«Maýsym úzdigi» kategorııasy boıynsha Qazaqstan toǵyzynshy orynnan kórindi. 2015 jylǵy maýsymmen salystyrǵanda 2016 jyly 0,379 upaı artyq jınady. Bul atalym boıynsha Belarýs top basynda. Ekinshi orynda – Ázirbaıjan. Úzdik úshtikke Latvııa endi.
Atalǵan reıtınginiń jalpy qorytyndysy boıynsha 8,469 upaımen Norvegııa alda keledi. Ekinshi jáne úshinshi oryndardy Fınlıandııa men Shvesııa bólisti. Qazaqstan 8,258 upaı jınap, 15-satyǵa ornalasty.
ÝEFA ár reıtıngtiń jeńimpazyna 50 000 eýro bóledi. Qarajat «Fair Play» jobalaryn júzege asyrýǵa jumsalady. Bıyl bul syıaqyny Estonııa, Belarýs jáne Norvegııa elderi aldy.
Aıta keteıik, «Fair Play» baǵasyn ÝEFA delegattary beredi. Olar jankúıerler men komandalardyń tártibine súıenedi. Sonymen qatar, qarsylas pen tóreshige degen qurmet baǵalanady. Oıynshylardyń sary jáne qyzyl qaǵaz alýy da kórsetkishke áserin tıgizedi.
