UFC prezıdenti: Ronda Roýzı sporttan ketýi múmkin

UFC uıymynyń prezıdenti Dana Ýaıt jankúıerlerge uıymnyń burynǵy chempıony Ronda Roýzıdiń mansabyn aıaqtaýy múmkin ekendigin málimdedi. Bul týraly vesti.kz habarlady. «Eger Rondamen sóılesetin bolsam, oǵan ary qaraı jekpe-jekke shyǵýyńdy toqtat dep aıtatyn edim. Meniń oıymsha ol UFC-daǵy karerasyn aıaqtady. Ol tóbelesti túbegeıli qoıyp, jańasha ómir súrýge talpynyp júr. Ol UFC-di jaqsy kóretin. Reıtıng, jeńis, jankúıerlerdiń qoshemeti ol úshin óte mańyzdy edi. Biraq sońǵy kezdegi sátsizdikterinen keıin oıyn túbegeıli ózgertken sııaqty», – dedi UFC prezıdenti. «Qazir ózin basqa qyrynan kórsetýge talpynyp júr.ol basqa sharýlarmen aınalysyp júr. Sportta júrip biraz jetistikke jetti, aqshasy da jeterlik. Sondyqtan qarjy jaǵynan qınalady dep oılamaımyn», – dedi ol. «Ronda sportqa aıtarlyq úles qosty. Qyzdarǵa MMA-diń jolyn ashyp berdi. MMA-den qyzdar arasynda ótken eń aıtýly jekpe-jekke qatysty. Biraq endigi onyń ketetin ýaqyty kelgen sııaqty», – deıdi Ýaıt. Aıta keteıik, Ronda Roýzı 2015 jyldyń 15 qarashasynda amerıkalyq Hollı Holmnan ońbaı utylyp, alǵash ret jeńiliske ushyraǵan. Jaraqatynan aıyǵyp, jekpe-jekke qaıta shyqqan ol 2016 jyldyń 31 jeltoqsanynda Las-Vegasta UFC 207 týrnırinde brazılııalyq Amanda Nýnesten 48 sekýndta jeńilip qaldy. Segizburyshta ol barlyǵy 14 kezdesý ótkizip, 12 aıqasynda basym túsken.