Taǵy bir kezeńdi baǵyndyrýǵa arnalǵan strategııalyq jospar – J.Ahmetbekov

Prezıdent elimizdiń bolashaq damýyn, ıaǵnı «Qazaqstannyń úshinshi jańǵyrýyn» qazirgi zamannyń ozyq tehnologııalaryn ıgerýmen, meńgerýmen baılanystyrdy. Ortalyq kommýnıkasııalar qyzmetinde ótken brıfıngte Qazaqstan Kommýnıstik halyq partııasynyń Elbasy Joldaýyna qatysty pikir-tujyrymdarymen bólisken Parlamenti Májilisiniń depýtaty, partııanyń Ortalyq komıtetiniń hatshysy Jambyl Ahmetbekov osylaı dedi. Onyń aıtýynsha, Joldaý baspasózge jarııalanǵannan beri halyqtyq kommýnıster jınalyp, qujatty qyzý talqylap, óz oı-pikirlerin bildirýde. «Keshe Astana qalalyq komıtetinde jáne oblystarda osy máselege arnalǵan jıyndar ótti. Kommýnıster bul Joldaýdy da elimizdiń taǵy bir kezeńdi baǵyndyrýǵa arnalǵan strategııalyq jospary dep tanyp otyr», – dedi J.Ahmetbekov. Ol dúnıe júzindegi damyǵan elderdiń qaı-qaısysy da damý satysyna tek ozyq tehnologııalardyń arqasynda qol jetkizgenin atap ótti. «Prezıdent elimizdiń bolashaq damýyn, ıaǵnı «Qazaqstannyń úshinshi jańǵyrýyn» qazirgi zamannyń ozyq tehnologııalaryn ıgerýmen, meńgerýmen baılanystyrdy. Sondyqtan da osy Strategııalyq Qujat elimizdi damýdyń bıigine alyp shyǵatynyna senemiz», – dep málimdedi depýtat. Ol sondaı-aq Elbasy Joldaýda agroónerkásip keshenin damytýdyń jańa memlekettik baǵdarlamasyn damytý týraly tapsyrma bergenin aıtyp ótti. «Aýyl sharýashylyǵy salasynda sheshimin kútip turǵan másele óte kóp, Joldaýdaǵy jer máselesi, sýbsıdııa, sharýa qojalyqtary, sapaly ekologııalyq taza ónim óndirý, ǵylymı jetistikter jáne taǵy basqalary. Bul máseleler kommýnısterdiń ǵana emes, halqymyzdyń jartysyn quraıtyn aýyl halqynyń da qyzyǵýshylyǵyn týǵyzdy, – dedi Kommýnıstik halyq partııasy Ortalyq komıtetiniń hatshysy. – Bizdiń partııamyzdyń negizgi elektoraty qarapaıym buqara halyq. Barlyq partııalyq qujattarymyzda da basty qundylyǵymyz buqara dep kórsetilgen. Sondyqtan da Joldaýdaǵy áleýmettik máselelerdi áli de tereń zerdeleıtin bolamyz». Aıdar О́risbaev, "Egemen Qazaqstan"