Mańǵystaýda «Salbýryn» atty et­nografııalyq shara uıym­dastyryldy

Tastaǵy tańbalar, jazýlar, belgiler jáne arheologtarymyzdyń jer astynan tapqan ár túrli buıymdary qusbegiliktiń tarıhy eki myńjyldyqtan áride jatqanyn aıǵaqtaıdy. Qazaqpen birge jasap, Uly Dala eliniń tól mádenıetiniń bir butaǵy bolyp kele jatqan qusbegilik óner Mańǵystaýǵa da jat emes eken. Respýblıkanyń basqa oblystarynda saıatshylar, qus­begiler klýbtary ashylyp jáne olar jyl saıyn túrli jarys­tar ótkizip, bul óner damytýdy jaqsy jolǵa qoıyp keledi. Mańǵystaý oblysynda kenje qalyp kelgen bolatyn, tek sońǵy 3-4 jyl kóleminde Mańǵystaý aýdanyndaǵy Tushybek aýy­lynyń jastary tól ónerdi damytýdy qolǵa alyp, qusbegilik ónermen shuǵyldanyp júr. Olar «Qaýyrsyn» atty klýb quryp, dala tósinde jattyǵý jumystaryn júrgizedi. Mańǵystaýda aqpan kúshine mindi – aıaz qataıyp, qar jaýy­p, aınala aq kórpe jamyldy. Osy qarsańda Otpan taý eteginde «Otpan» mekemesi qyzmet­kerleri qazaqtyń bekzat óneri – qusbegilikke arnal­ǵan dástúrli «Salbýryn» atty et­nografııalyq shara uıym­dastyrdy. Sharaǵa qusbegiler men mektep oqýshylary qatysty. – Bul sharany uıymdas­tyrýdaǵy maqsatymyz – tól ónerdi damytý jáne jas urpaqty keń dalada atqa minip, ań aýla­p, qus salyp degendeı shırap-shıryǵyp ósýi úshin qyzyqtyrý. Jastardyń qyzyǵýshylyǵy bar, olar «Qaýyrsyn» klýbyn qurǵanmen, árqaısysy ár salada bolǵandyqtan, tól ónermen etene aınalysa almaı júr. О́lkemizde atadan qalǵan ónerdi damytý úshin janashyr kózqaras kerek-aq. Qusbegilikti damytýǵa kásipker azamattar nazar aýdarsa eken, – deıdi «Otpan» mekemesiniń qyzmetkeri, uıym­das­tyrýshylardyń biri Jomart Aıdarbek. Saıat kıimderin kıip, qolda­ryna qyran qustaryn alyp kelgen qusbegilerdi kórgende oqýshylar burynǵy sal-seri­lerdi kórgendeı áserde boldy. Olar oqýshylarǵa qusbegilik, qyran qustardyń túrleri, olardy qalaı ustap, asyrap-baptap, qalaı baýlyp ańǵa salý kerektigi týraly aıtyp, qyrandardyń dene qurylysyndaǵy erekshelik­terimen tanystyrdy. Shara sońynda qaıyrý kezinde babynda turǵan búrkitterdi qoıanǵa salyp, shyrǵaǵa túsirip, alystan qıqýlap qolǵa shaqyryp qon­dyrý synaqtarynan ótkizdi. Gúlaıym ShYNTEMIRQYZY, «Egemen Qazaqstan» Mańǵystaý oblysy Sýretterdi túsirgen Talant QUSAIYN