Buzaýdyń aýzyn japqan sentner
Aqmola oblysynyń Eńbekshilder aýdanyndaǵy «Mamaı» degen keńsharǵa Qabdolla Bıttiǵulov degen azamat dırektor bolyp, onyń turalap qalǵan sharýashylyǵyn kóterýge kóp eńbek sińirdi. Sol keńshardy basqarýdyń alǵashqy jylynda oblystaǵy jınalysta «Mamaı» keńsharyn 100 sıyrdan 35-aq buzaý aldy dep qatty synapty. Kelesi jyly alqaly jıynda prezıdıýmda otyrǵan Qabdollany kórgen bir áriptesi: – Byltyr 35 qana buzaý aldyń dep seni qatty sógip edi, bıyl qalaı tórge ozdyń? – depti ázildep. Oǵan Qabekeń saspastan: – Gektaryna 25 sentner 35 buzaýdyń aýzyn japty ǵoı, – dep jaýap qaıtarypty.Mamaı tizeńnen kelmeı tur ma?
«Mamaı» keńsharynda bir azamattyń áıeli adýyndy, urysqaq bolsa kerek. Sol birde: – Saǵan eregiskende Itemgenge baryp sýǵa ketip ólemin, – dep kúıeýin bopsalap qorqytypty. Sony kórip turǵan Qabekeń: – Osy jerden 15-18 shaqyrym Itemgenge jetkenshe ábden dińkelep sharshaısyń. Myna turǵan Mamaı ne, tizeńnen kelmeı tur ma? – depti aýyldyń irgesinde jaınap jatqan aıdyn kóldi nusqap.Buıyrǵan dám-tuz degen...
Aýdanda mekeme basshysy bolǵan Sáken degen aǵamyz shalǵaıdaǵy bir keńsharǵa baryp jınalysqa qatysyp, sóz sóılep, odan keıin jasalǵan dastarqanda máre-sáre bolyp birshama otyryp, qona qalyńdar degenge qaramastan jolǵa shyqqan ǵoı. Qazan aıynyń aıaǵy bolsa kerek, birazdan keıin qarsy betten japalaqtap qalyń qar jaýyp, joldy múlde kórsetpeı qoıypty. Júrgizýshisi: – Aǵa, budan ári júrgize almaımyn, – degen soń Sákeń: – Qon degende qonbadyq, endi qaıtyp barýymyzdyń jóni bolmas, mashınany yqtasyndatyp keri buryp qoı, tań atýǵa da jaqyn qaldy ǵoı, bir azyraq kóz shyrymyn alaıyq, – dep uıqyǵa kirisip, tań siberlep atyp kele jatqanda kólikke ot aldyryp júrip ketipti. Biraz júrgennen keıin eldi mekenniń qarasy kóringenge anyqtap qarasa, sol ózderi shyǵyp ketken keńsharǵa qaıtadan kelip tur eken. Aldynda mashınany keri buryp qoıǵany esterinen shyǵyp ketkenin ekeýi sonda ǵana túsinipti. Sol jerde Sáken aǵamyz: – Keshegi úıdiń dám-tuzy bizdi jibermeı tur eken, endi attyń basyn sonda bur, – degen eken saspastan. Orynbaı ShÁIKENOV baspasóz ardageri ASTANA
