Almatyda «Altyn qalam - 2016» táýelsiz ádebı júldesiniń jeńimpazdary marapattaldy, dep habarlady júldeniń uıymdastyrý komıteti.
«Yqylas atyndaǵy Halyq mýzykalyq aspaptar murajaıynda jeńimpazdardyń esimi jarııalandy. Júldeniń qysqa tizimine Qazaqstannyń ár óńirinen qatysyp otyrǵan avtorlardyń orys jáne qazaq tilderinde jazǵan 30 shyǵarmasy 6 atalym boıynsha engizildi», - delingen taratylǵan habarlamada.
Jumystar 2016 jyldyń 1 shildesinen bastap 15 qazanǵa deıin qabyldandy. Keıin oqyrmandar 31 qazanǵa deıin daýys berdi. Barlyq shyǵarma akalam.kz saıtyna ornalastyryldy. Bıyl ádebı júldege 446 avtor ártúrli janrda jazylǵan 863 shyǵarmany usyndy. Uıymdastyrý komıtetiniń jáne qazylar alqasynyń quramyna Qýat Dombaı, Dosym Sátpaev, Kenje Jumanuly, Aıdos Sarym, Arman Shoraev, Rasýl Jumaly, Áıgerim Raıymqulova, Tatıana Fılıpchık jáne basqalar endi.
Budan bólek, bıyl Qazaqstan Respýblıkasy Táýelsizdiginiń 25 jyldyǵyna oraı qazaqtyń úzdik romanyna alǵash ret arnaıy báıge jarııalandy. «JYLDYŃ ÚZDIK ROMANY» atalymy boıynsha «Men jyndymyn» shyǵarmasymen jeńimpaz atanǵan Sáýketaev Turysbek mesenat Keńes Raqyshev taǵaıyndaǵan 1 000 000 teńgege ıe boldy.
Sonymen qatar, QAZKOM bankiniń qarjylaı qoldaýymen baıqaýdyń tańdaýly shyǵarmalary 2017 jyly jaryq kóretin «Altyn qalam 2016» ádebı júldesiniń jınaǵyna enedi.
Sondaı-aq bıyl baıqaýǵa qazaqstandyq avtorlardan bólek AQSh, Malaızııa, Germanııa, Chehııa, Ýkraına, Reseı, О́zbekstan, Qyrǵyzstan jáne Izraıl azamattary da qatysty.
«Bıyl bizdi QAZKOM bankinen bólek, «ZHERSU» ınvestısııalyq-óndiristik korporasııasy Baqylaý keńesiniń tóraǵasy, belgili mesenat Baýyrjan Ospanov, sondaı-aq, Qazaqstan baspasóz klýby men Qazaq radıosy qoldap otyr», - delingen habarlamada.
