Almaty Kıpr tájirıbesine júginbek

Almaty jáne Kıpr týrıstik servıs salasynda tájirıbe almasady. "Kıprdiń týrıstik servısten jıǵan tájirıbesi mol jáne bizge barynsha qyzyq", - dedi Almaty ákimi Baýyrjan Baıbek Kıpr Respýblıkasynyń Reseı Federasııasy men Qazaqstandaǵy Elshisi Georgıos Kasýlıdıspen kezdesý barysynda. Bul týraly Almaty qalasy ákimdiginiń baspasóz qyzmeti habarlady. Taraptar saýda-ekonomıkalyq, mádenı- gýmanıtarlyq baılanystardy odan ári nyǵaıtý jáne týrızm salasynda tájirıbe almasý máselelerin sóz etti.

«Almatyda 150-ge jýyq sáýlet, tarıh, mádenı eskertkishter bar. Qazaqstannyń IýNESKO-nyń Búkilálemdik mádenı muraǵatyna engen segiz nysannyń tórteýi, sonyń ishinde Talhız qalasy men Tamǵaly tańbasy bar qyrly tastar ońtústik astana aımaǵynda. Qazaqstan 2017 jyldyń 1 qańtarynan bastap 56 memlekettiń azamattary úshin vızasyz rejım kestesin odan ári keńeıtedi. Budan ózge Almatyda Búkilálemdik qysqy Ýnıversıada ótedi. Kıprdiń týrıstik servısten jıǵan tájirıbesi mol jáne bizge barynsha qyzyq», - dedi B.Baıbek. Megapolıs basshysy eki jaqty saýda-ekonomıkalyq baılanystyń joǵary áleýetin da atap ótti. Mysaly, 2016 jylǵy qarashada qalada 44 birikken jáne 147 kıprlik kásiporyn tirkelgen. «Almaty el ekonomıkasynyń bes bóligin quraıdy, bul bıznes pen shıkizatsyz jeke kapıtal qalasy. Munda halyqaralyq uıymdar men transulttyq kompanııalardyń 60 keńsesi, bank ofısteriniń 90%-dan astamy ornalasqan. Investorlarǵa qoldaý kórsetýdiń keshendi sharalary júzege asýda», - dedi qala basshysy. Kıpr Elshisi óz kezeginde tabıǵı resýrstar men bilim berý jáne basqa da salalar boıynsha baılanysty odan ári nyǵaıtýǵa yntaly ekenderin aıtty. G.Kasýlıdıs tikeleı áýe qatynasyn ashýdyń ýaqyty kelgenin de sóz etip, bul ekijaqty týrıster legine oń yqpal etetinin jetkizdi. Ol óziniń sózinde Almatynyń sulý qala ári tabıǵatynyń tym kórkem ekenin tamsana aıtty. Al bul týrısterge barynsha tartymdy.