Ilıa Ilın er jigitke tán sheshim qabyldady – Musaıbekov

Keshe aýyr atlektıkadan tórt dúrkin álem chempıony Ilıa Ilın ulttyq komandalar jáne sporttyq rezervter dıreksııasyndaǵy keńesshi qyzmetinen óz erkimen ketkendigin málimdegen bolatyn. Osy jóninde Mádenıet jáne sport vıse-mınıstri Sáken Musaıbekov pikirin bildirdi. «Bolǵan jaǵdaıdy estigende tóbemizden jaı túskendeı boldy. Men ony maqtan tutyp kelemin. Olımpıadalarda tek jeńis tilep júrdim. Ol rekordtardy birinen soń birin jańartty. Mádenıet jáne sport mınıstri Arystanbek Muhammedıulyna da, maǵan da, mınıstrlik qyzmetkerlerine de bul jaǵdaı aýyr tıdi», – dedi ol. Budan keıin vıse-mınıstr sportshynyń ulttyq komandalar jáne sporttyq rezervter dıreksııasyndaǵy keńesshi qyzmetinen ketkendigine qatysty pikirin bildirdi. «WADA kodeksi bar. Ol boıynsha dopıng qoldanǵan sportshy jarystan shettetiledi. Al Ilıa Ilın jarystan shettetilip otyr. Biraq ol bul shekteýdi Halyqaralyq aýyr atletıka federasııasynan da aldy. Budan keıin onyń sport salasynda jumys isteýge eshqandaı quqyǵy joq. HOK-tan hat kelgenge deıin Ilıa keńesshi qyzmetin atqaryp keldi. Al hat kelgennen keıin bul qyzmetinen de ketý týraly sheshim qabyldady. Oǵan eshkim qysym jasaǵan joq, óziniń tańdaýy. Ilıa Ilın er jigitke tán áreket jasady. Ol oqyǵysy keledi. Bolashaqta bıznespen shuǵyldanýy múmkin. Oǵan barlyǵymyz qoldaý bildireıik», - dedi vıse-mınıstr. Aıta keteıik, QR Ulttyq Olımpıada komıteti Halyqaralyq Olımpıada komıtetinen 2008 jáne 2012 jyldardaǵy Olımpıada oıyndaryna qatysqan qazaqstandyq sportshy Ilıa Ilınge qatysty jaza qoldanylǵandyǵy týraly resmı habarlama aldy. Sportshynyń qanynan tyıym salynǵan preparattar tabylǵan bolatyn.