Qazaqstan Respýblıkasynyń Ulttyq Banki «Qazaqstannyń ádet-ǵuryptary, ulttyq oıyndary» monetalar serııasynan nomınaly 500 teńgelik, «proof» sapaly kúmisten jáne nomınaly 100 teńgelik neızılber qospasynan «Qyrqynan shyǵarý» eskertkish monetalaryn aınalysqa shyǵardy, dep habarlaıdy Ulttyq Banktiń baspasóz qyzmeti.
Qyrqynan shyǵarý – týǵanyna 40 kún tolǵan sábıge qatysty ótkiziletin ejelgi dástúr. Dástúrdiń máni balany 40 qasyq tuzdy sýǵa shomyldyrýdan turady. Sý quıylǵan ydysqa kúmis áshekeıler, monetalar salady, sebebi kúmis ejelden tazalyqtyń nyshanyn bildiredi, bále-jaladan qorǵaıdy dep esepteledi.
Kúmisten jáne neızılber qospasynan jasalǵan monetalardyń bet jáne syrt jaqtaryndaǵy beıneler birdeı. «Rroof» sapaly kúmis monetalardaǵy beıne jyltyr betke salynǵan. Monetalardyń bet jaǵynda (aversinde) ortalyq bóliginde oıý-órnek aıasynda Qazaqstan Respýblıkasynyń eltańbasy beınelengen. Tómengi jaǵynda monetanyń nomınalyn bildiretin san (kúmis monetada «500», neızılber qospasynan jasalǵan monetada «100») jáne «TEŃGE» degen jazý bar. Sol jáne oń jaǵynda ulttyq oıý-órnek elementi bir-birine qarama-qarsy beınelengen. Aınaldyra memlekettik tilde «QAZAQSTAN RESPÝBLIKASY» jáne orys tilinde «RESPÝBLIKA KAZAHSTAN» dep jazylǵan.
Monetalardyń syrt jaǵynda (reversinde) ulttyq dástúr – qyrqynan shyǵarýdyń bir sáti beınelengen. Sol jaǵynda Qazaqstan Respýblıkasy Ulttyq Bankiniń logotıpi bar. Aınaldyra memlekettik tilde «QYRQYNAN ShYǴARÝ» degen jazý, soǵylǵan jylyn bildiretin «2016» degen san, moneta daıyndalǵan metaldy, onyń synamyn jáne massasyn bildiretin «Ag 925 24 g» degen jazý (kúmisten jasalǵan monetada ǵana) bar.
Nomınaly 500 teńgelik jáne 100 teńgelik eskertkish monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna esepteý jáne aýdarym jasaý úshin qabyldanýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady.
Eskertkish monetalardy «Qazaqstan Respýblıkasy Ulttyq Bankiniń Qazaqstan teńge saraıy» sharýashylyq júrgizý quqyǵyndaǵy respýblıkalyq memlekettik kásiporny daıyndaǵan. «Proof» sapasymen jasalǵan eskertkish monetalar kolleksııalyq quny boıynsha satýǵa arnalǵan. Olar kádesyılyq oraýmen shyǵarylady jáne Qazaqstan Respýblıkasy Ulttyq Bankiniń memlekettik, orys jáne aǵylshyn tilderindegi nómirlik sapa sertıfıkatymen jabdyqtalǵan.
