Jańa anımasııalyq fılm shyǵady

«Muzbalaq» anımasııalyq fılmi kórermenge keler jyly jol tartpaq, dep habarlady Qazaqfılmniń resmı ınternet-resýrsy. 60 mınýttyq anımasııalyq fılmdi jaryqqa shyǵarý úshin úsh jyl tapjylmaı eńbek etý kerek. 22 adamnan turatyn shyǵarmashylyq top shamamen 85 myń sýret salýy tıis. Fılmniń rejısserleri Tilek Tileýǵazy men Turdybek Maıdan daıyndyq jumystary 2015 jyldyń qyrkúıeginde bastalǵanyn jetkizdi. Anımasııalyq fılm 2017 jyldyń tamyz aıynda daıyn bolmaq. Rejısserdiń pikirinshe, shet eldik ónimderge qaraǵanda otandyq fılmderdiń bereri mol. Patrıottyq sezimdi oıatyp, dástúrdi dáriptep, ulttyq ıdeologııany nasıhattaıtyn birden bir qural - anımasııalyq fılmder. «Muzbalaq» kórinisiniń jelisinde adamnyń búrkitti alǵash ret qolǵa úıretýi baıandalady. Onda qyran qustyń qazaq arasyndaǵy erek orny men qasıeti kórsetiledi. Daıyndyq barysynda Qazaqstannyń kórikti jerleri zerttelip, ulttyq naqyshta keıipkerlerdi kórsetýge asa kóńil bólingen. «Árıne, fılm ulttyq bolǵannan keıin, qazaqı bolǵannan keıin onyń stılin de qazaqı etip shyǵarý kerek boldy. Demek, kórinisterdiń tereńdigin, qazaq jeriniń baılyǵyn, keńdigin, ádemiligin, sulýlyǵyn kórsetý kerek. Sol úshin osy kórinisterge barymyzdy salyp, arnaıy ekspedısııamen shyǵyp, fotoǵa túsirip, sony zertteginniń barlyǵyn, túıgenimizdi osy fılmge salyp otyrmyz», - dedi «Muzbalaq» anımasııalyq fılminiń qoıýshy-sýretshisi Adaı Ábildanov. Sonymen qatar, «Qazaqfılm» kınostýdııasynda «Kúltegin» tolyqmetrli mýltfılminiń óndiriske daıyndyq jumystary bastaldy. Bul joba Adaı Ábildanovtyń rejısserlik etýimen jaryq kórmek. Aldaǵy ýaqytta onyń shyǵý ýaqyty belgili bolady.