Jańa baǵdarlamanyń negizgi mindetteri túsindirildi

Kezekti Úkimet otyrysynan keıin ótken baspasóz máslıxatynda Densaýlyq saqtaý jáne áleýmettik damý mınıstri Tamara Dúısenova nátıjeli jumyspen qamtý jáne jappaı kásipkerlikti damytýǵa arnalǵan jańa baǵdarlamanyń negizgi maqsat-mindeti jaıynda túsindirdi. «Mysalǵa alaıyq, 2008-2011 jyldary biz arnaıy jol kartasyn iske asyryp, jumyssyz qalǵandardy ýaqytsha jumyspen qamtýdy maqsat ettik. Al 2011 jyldan bastap ony jalǵastyrsaq ta, aýylǵa qaraı burýǵa tyrystyq, sol jerdegi xalyqty jumyspen qamtýdy qaladyq. Degenmen, «Jumyspen qamtýdyń jol kartasynda» daǵdarysqa qarsy sharalar basym boldy. Qazir biz jańa kezeńge aıaq basyp otyrmyz. Sondyqtan xalyqtyń qajetti mamandyqty ıgerip alýyna jan-jaqty jaǵdaı jasamaqpyz. Osynyń nátıjesinde azamattar ózdigimen jumys taba alady nemese óz kásibin ashsa da bolady. Osyǵan baılanysty «Jumyspen qamtýdyń jol kartasy» qaıta qaralyp, nátıjeli jumyspen qamtý jáne jappaı kásipkerlikti damytýdyń jańa baǵdaralamasy retinde qolǵa alynady», – dedi Dúısenova. Onyń aıtýynsha, jańa baǵdarlamaǵa «Bıznestiń jol kartasy - 2020» baǵdarlamasy da enip ketedi. «Qazirgi ýaqytta shaǵyn bıznesti ashýǵa qajetti mıkronesıeler jumyspen qamtý baǵdarlamasynda da, bıznestiń jol kartasynda da, agroónerkásip baǵdarlamasynda da bar. Endi sol barlyq quraldardy bir baǵdarlamaǵa jıyp, biryńǵaı sharttarmen bergeli otyrmyz. Sebebi azamattar árbir baǵdarlamaǵa ártúrli qujattar jınaıdy. Endi, bári birdeı bolady», – dedi mınıstr. Jańa baǵdarlamanyń aıasynda kez kelgen adam naryqtyq suranysy bar mamandyqty ıgere alady. Al jumys tappasa, jeke bıznesti ashýǵa múmkindik bar. Bıýdjet qarjysy bolsa burynǵy baǵdarlamalardan tartylady. «2017 jylǵa 66 mlrd teńge, 2018 jylǵa 82 mlrd teńge, 2019 jylǵa taǵy oǵan qosymsha qarjy qosylady. Ol 96 mlrd teńgeniń kóleminde bolady dep otyrmyz. Bul qarajat búgingi jumyspen qamtý baǵdarlamasy, «Bıznestiń jol kartasy», sonymen birge «Damý» qorynyń esebinen tartylady», – dedi Densaýlyq saqtaý jáne áleýmettik damý mınıstri.