Bıyl elimizde kememen 100 myńnan astam jolaýshy tasymaldandy

Tasymaldaýshylardyń aqparaty boıynsha bıyl navıgasııa kezeńinde ózen kóligimen 1,3 mln tonnaǵa jýyq ár túrli júk tasymaldandy, onyń ishinde 160 myń tonnadan astam júk Ertis ózeni arqyly Reseıge eksporttaldy. Negizinen qurylys materıaldary, aǵash, qumdy-qıyrshyqtas qospasy, balyq ónimderi jáne t.b júk tasymaldandy, dep habarlady Investısııalar jáne damý mınıstrliginiń baspasóz qyzmeti. Sonymen qatar, bıyl keme kóligimen 100 myńnan astam jolaýshy tasymaldanǵan, bul ótken jylǵy kórsetkishten 80% artyq. Qazirgi ýaqytta Qazaqstannyń sý joldarynda keme júrisi toqtady. Keme qatynasynyń qaýipsizdigin arnaıy memlekettik kásiporyndar qamtamasyz etti. Memlekettiń tapsyrmasyna sáıkes, 3700-den astam navıgasııalyq belgi qoıdy, 2500 myń. m3 astam túbin tereńdetý, túbin tazartý jumystary jáne basqa jol jumystary jasaldy. Kóliktik baqylaý organdarynyń málimetterine sáıkes, bıyl navıgasııa kezeńinde sý joldaryn tıisti deńgeıde ustamaýǵa qatysty birde bir kólik oqıǵasy tirkelmegen. Aıta keteıik, keme qatynasy Ertis, Ile-Balqash jáne Jaıyq-Kaspıı basseıinderinde júzege asyrylady. Ýchaskileriniń jalpy uzyndyǵy – 4040,5 km jýyq. Bıyl 1 qarashaǵa deıin Qazaqstan Respýblıkasynyń keme tiziliminde 783 ózen kemesi jáne 28,7 myńǵa jýyq shaǵyn kólemdi keme tirkelgen. Pavlodar jáne Atyraý oblystarynda tıep-túsirý múmkindigi 1,5 mln tonnadan asatyn eki ózen floty jumys isteıdi.