Qostanaıda Táýelsizdiktiń 25 jyldyǵyna jáne oblystyń 80 jyldyǵyna arnalǵan shahmat týrnıri ótti. Oǵan 48 sportshy qatysty. 500 myń teńge júlde qoryn oblys ákimi men Qazaqstan halqy oblystyq assambleıasy qurdy. Týrnırge oblys ákimi Arhımed Muhambetovtyń ózi de qatysty. Týrnır shveısarlyq júıe boıynsha ótti.
Birinshi oryndy Lısakov qalasynan kelip qatysqan Oleg Golovchýk aldy. Ol respýblıkanyń 4 ret chempıony Petr Kostenkomen oınap,
Býhgols koeffısıenti
boıynsha jeńimpaz dep tanyldy. Oblys ákimi Arhımed Muhambetov respýblıka chempıony Alısa Qozybaevamen oınady. Birinshi partııada ákim chempıonnan jeńildi, ekinshi partııany teń oınady.
«Biz shahmat klýbyn jóndeýden ótkizdik. Bizdiń shahmatshylar jaqsy nátıje kórsetip júr. Elimiz chempıonatynda oblystyń quramasy ekinshi oryndy ıelendi. Bizdiń mindetimiz shahmat sportyna kelgenderge jaǵdaı jasaý. Shahmat tez oılaýǵa, sheshim qabyldaýǵa úıretedi. Men shahmatty bala jasymnan oınaımyn. Biz shahmat ańyzy Ýfımsev týraly kitapty qaıta bastyryp shyǵardyq. Aldaǵy ýaqytta ataqty grossmeısterlerdi shaqyryp, Qostanaıda halyqaralyq týrnır ótkizýdi oılastyramyz. Balalardy osy sport túrine qyzyqtyrý kerek», dedi oblys ákimi Arhımed Muhambetov.
Názıra Járimbetova, "Egemen Qazaqstan".
Sýretti túsirgen Nıkolaı Solovev
