Búgin Jazýshylar odaǵynda aqyn, kompozıtor, akter Ermurat Zeıiphannyń 50 jyldyǵy aıasynda atqarylatyn sharalar týraly press-konferensııa ótti ári aqynnyń «Dúnıe ǵapyl» atty shyǵarmalar jınaǵy jaryq kórdi.
Sharaǵa Halyq jazýshysy Qabdesh Jumadilov, QR Jazýshylar odaǵy tóraǵasynyń birinshi orynbasary Ǵalym Jaılybaı, Jazýshylar odaǵy tóraǵasynyń orynbasary Janarbek Áshimjan, qytaıtanýshy, tarıhshy-ǵalym Nábıjan Muhamethanuly, aqyn Almasbek Ahmetbekuly qatysyp, Ermurat Zeıiphannyń shyǵarmashylyǵy men ómiri jaıynda keń maǵlumat berdi.
Qabyrǵaly qalamger Qabdesh Jumadilov: «Ermurat talantymen, taǵdyrymen, ónerimen jáne bólek bolmysymen bárimizdi moıyndatty. Ony kúni keshegi serilerdeı kórdik. О́leńi qandaı, prozasy qandaı, ánderi qandaı edi? «Kók týdyń jelbiregeni» búginderi barsha qazaqtyń jatqa aıtatyn ánine aınaldy. «Kúnes-aıy» týǵan jer týraly quıylyp túsken biregeı týyndy edi. Onyń 70-ke jýyq áni bar, oryndaýshysy tabylsa eldiń rýhyn kóteretin súbeli týyndylarǵa kende emes. О́leńderindegi syrbazdyq, shynshyldyq jaıynda áli de bolsa tereńirek zertteý kerek», – dedi.
Al N. Muhamethanuly: «Naǵyz patrıot kim dese – Ermuratty, naǵyz degdar jan kim dese – Ermuratty, naǵyz qarapaıym óner ıesi kim dese – taǵy da Ermuratty aıtýǵa bolady. Ol óziniń adal da shynaıy bolmysymen bárimizge syıymdy, úlgi bolǵan azamat», – dedi.
Aldaǵy sársenbi kúni keshki saǵat 18.00-de Áýezov teatrynda Ermurat Zeıiphandy eske alýǵa arnalǵan «Eki dúnıede jalǵyzym – Qazaqstan» atty shyǵarmashylyq kesh ótedi. Keshte belgili óner juldyzdary Ermurat Zeıiphannyń ánderin shyrqaıdy.
