Kásipkerlerge ákimshilik kedergiler bolmaıdy

Ońtústik Qazaqstanda «Qazaqstannyń sybaılas jemqorlyqqa qarsy zamanaýı saıasaty» taqyrybynda májilis ótti. Jıynǵa Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev pen oblys ákimi Janseıit Túımebaev, oblystyq basqarma basshylary, quqyq qorǵaý organdary basshylary, joǵary oqý oryndarynyń rektorlary, dinı konfessııalardyń jáne buqaralyq aqparat quraldarynyń ókilderi, bilim berý, densaýlyq saqtaý jáne mádenıet uıymdarynyń basshylary qatysty. Sonymen qatar, semınar jumysyn beıneselektr arqyly qala jáne aýdan ákimderi, mektep dırektorlary men bas dárigerler, jastar men qoǵam ókilderi kórdi. Májiliske tóraǵalyq etken J.Túımebaev Memleket Basshysynyń «100 naqty qadam» Ult josparynda sybaılas jemqorlyqqa qarsy kúresti kúsheıtý máselesine basa nazar aýdarylǵanyn aıtyp, búgingi talqylanatyn - Memlekettik qyzmet isteri jáne sybaılas jemqorlyqqa qarsy is-qımyl agenttiginiń bastamasymen uıymdastyrylǵan basty taqyryptyń ózektiligine toqtaldy. - Jemqorlyqtyń memlekettik basqarýdyń tıimdiligin, eldiń ınvestısııalyq tartymdylyǵyn tómendetetini, áleýmettik-ekonomıkalyq damýdy tejeıtini barshaǵa málim. Osyǵan oraı, jemqorlyqtyń paıda bolýyna yqpal etetin jaǵdaılardy joıý, memlekettik qyzmetterdiń sapasyn arttyrý, sonymen qatar, jemqorlyqqa qarsy mádenıetti qalyptastyrý – búgingi qoǵamnyń eń basty máselesi. Memleketimizdiń qozǵaýshy kúshi kásibı memlekettik apparat, ıaǵnı memlekettik qyzmetshiler bolyp tabylady. Sondyqtan da, memlekettik qyzmetshiler arasynda sybaılas jemqorlyqqa qarsy is-qımyl týraly zańnama talaptaryn qatań saqtaý asa mańyzdy. Sonymen qatar, sybaılas jemqorlyqqa alyp baratyn jol qarapaıym ádep normalaryn saqtamaýdan týyndaıtynyn atap ótken jón, - dedi aımaq basshysy. Baqtııar TAIJAN, «Egemen Qazaqstan». Ońtústik Qazaqstan oblysy.