Birde-bir aryz qaraýsyz qalmaıdy

«Táýelsiz Qazaqstan» poıyzy shtabynyń jetekshisi osylaı dedi Astana qalasynan bastaý alǵan, el Táýelsizdiginiń 25 jyldyǵyna arnalǵan «Táýelsiz Qazaqstan» poıyzy Ońtústiktiń shyǵys qaqpasy sanalatyn Túlkibas aýdanynda tizginin tartty. Quramynda mınıstrlikterdiń jetekshi mamandary, sarapshylar, zańgerler, medısına qyzmetkerleri bar poıyzdy aýdan halqy kóterińki kóńil kúımen qarsy aldy. Túlkibas temirjol stansasy – alashtyń qaıratker uly, qazaq dalasyna alǵash ret Túrksib temir jolynyń tartylýyna uıytqy bolǵan Turar Rysqulov ashqan bekettiń biri ári biregeıi. Bylaı aıtqanda, sol dáýirden qalǵan kózi tiri jádiger. Stansa alańynda poıyz delegattaryna oblys ákiminiń orynbasary Ulasbek Sádibekov oblys bas­shysy Janseıit Túımebaevtyń qut­tyqtaýyn jetkizip, 25 jyl ara­lyǵynda Ońtústik jetken jetis­tikterdi qysqasha túıindedi. «Táýelsiz Qazaqstan» poıyzy shtaby­nyń jetekshisi Ámirjan Álpeıisov óz sózinde bul sharanyń halyq pen bılik arasyndaǵy altyn kópir ekendigin, shırek ǵasyr­da Qazaqstan júrip ótken jol­dar­dyń jetistikterin nasıhattaý­dan bólek, arnaýly mamandardyń halyq­tyń áleýmettik, quqyqtyq máse­lelerin sheshýge septesetindigin aıtty. Delegattar quramynda jeti mı­nıstrlik pen úsh ulttyq kompanııanyń jaýapty qyzmetkerleri osy maqsatqa jumys jasaıdy, dedi. Aıtqandaı, shaǵyn konserttik baǵ­dar­lamadan keıin olar óz ju­my­syna shuǵyl kirisip ketti. Áleý­mettik, quqyq­tyq jáne medısınalyq, aýyl sharýa­shylyǵy, bilim salasy sııaqty ózekti máseleler boıynsha mamandar jergilikti qyzmetkerlermen birlese qoǵamdyq qabyldaý ótkizdi. Bul poıyzdy kútip júrgen halyq kóp eken. Aýdandyq aýrýhananyń ishi men syrty tolyp-aq qalypty. Jergilikti medısına sheshe almaıtyn másele kóp. О́zin Beskempir Balǵabaev dep tanystyrǵan aqsaqaldyń eki azamat ulyn 2011 jyly kóshede avto­kólik qaǵyp, qashyp ketken. Búginde keshegi atpaldaı eki azamat I top múgedegi. Dáretke ózdiginen otyra al­maıdy. Eki kelin tórkinine ketip qalǵan. Aqsaqal uldarynyń dertine shıpa bolar ma degen úmitpen kelgen. Poıyz quramyndaǵylar aıanyp jat­qan joq. Jergilikti jerde emdeý múmkin emesterge respýblıkalyq klınıkalarǵa kvota máselesin sheship berýde. Qoǵamdyq kelisim keńesi men «Nur Otan» partııasynyń qoǵamdyq qabyl­daýynda boldyq. Munda da ózek­ti máseleler alǵa tartylýda. Máselen, «Keltemashat» aýyly­nyń turǵyny Ábil Kerimqulov aq­sa­qaldyń aryz aıtyp, qaqpaǵan qaqpasy, ashpaǵan esigi qalmaǵanǵa uqsaıdy. Jeke basynyń emes, aýyldyń máselesi. «Batys Eýropa – Batys Qytaı» avtomagıstrali 27 otbasy turatyn aýyldyń janynan ótkende, kólik kirip-shyǵatyn jol tas­tamaı ketken. Aýyl syrtynda kópir asty mal ótetin ótkel bar, adam joly umyt qalǵan. Sonyń saldarynan Kershe­tastaǵy qashyqtyǵy 3,5 shaqyrym mektepke oqýshylar men ata-analary janyn shúberekke túıip baryp júr. Jeke kólikteri joqtar taksı toqtatyp amaldaıdy. Poıyzdaǵylardyń qatysýymen el Táýelsizdiginiń 25 jyldyǵyna arnalǵan «25 jyldyń belesteri» atty dáris-tanystyrý, «Táýelsizdik tarıhy – ult rýhynyń ólshemi» taqyrybynda zııaly qaýym jáne ardagerlermen kezdesý ótkizildi. «Beıbitshilik jáne kelisim» úlgisi Qazaqstan brendi, «Qazaqstandyq birtektilik – qazaqstandyqtardyń jeke jaýapkershilik faktory» taqyrybynda etnomádenı birles­tikter men úkimettik emes uıymdardyń qatysýymen kezdesýler ótkizilip, táýelsizdik jetistikteri aıtyldy. Aýdandyq ákimdiktiń májilis zalynda «Táýelsiz Qazaqstan» poıyzy shtabynyń jetekshisi Á.Álpeıisov, Astana qalasynyń qoǵamdyq kelisim keńe­siniń múshesi, professor, QHA múshesi Q.Qazkenov, Parlament Májilisiniń V shaqyrylym depýtaty, QHA múshesi E.Kappel sııaqty Qazaqstan halqy Assambleıasy ókilderi turǵyndardy qabyldady. Aksııanyń maqsaty boıynsha buqaralyq aqparat quraldarymen ótkizilgen brıfıngte delegattar jýrnalıster qoıǵan suraqtarǵa jaýap berdi. «Táýelsiz Qazaqstan» poıyzy shtabynyń jetekshisi búgingi qabyl­daý boıynsha birde-bir máseleniń jerde qalmaıtyndyǵyna sendirdi. Onyń aıtýynsha, jergilikti jerde sheshilýi qıyn máseleler hattalyp, Qazaqstan Prezıdenti Ákimshiligine joldanady. Árqaısynyń oryn­dalý merzimi belgilengendikten, óti­nish, aryz ıelerine eki jaqtan da jaýap qaıtarylady. Salalyq mı­nıstr­lik­ter men ulttyq kompanııa­lar kómek­tesedi. Al turǵyn úı kezegin sebep­siz alǵa jyljytý, kezekten tys dema­lys úıine joldama áperý sııaq­ty ótinish­ter qabyldanbaıdy. Sol sııaqty, sot sheshetin máseleler de dele­gat­tardyń quzyrynda emes. Aýdan boıynsha osy ýaqyttarda 1,5 myń­nan asa adam qabyldaýda bolyp, kópshiligi qanaǵattanarlyq kóńil kúımen shyqty. Keshqurym aýyl jastary orta­lyq alańda «Meniń elim – Qazaqstan» taqy­rybynda fleshmob ótkizip, sońy aýdandyq mádenıet saraıynda Táýel­sizdiktiń 25 jyldyǵyna arnalǵan konsertke ulasty. Kesh túnge aýysqan tusta «Táýel­sizdik poıyzy» Túlkibas temir jolynan kıeli qala Túrkistanǵa attanyp ketti. Baqtııar TAIJAN, «Egemen Qazaqstan» Ońtústik Qazaqstan oblysy