«Qazaq eli osyndaı...» dep án salady jastar

Oblys ortalyǵyndaǵy «Dostyq» konsert zalynda oblystyq Qazaqstan halqy Assambleıasy men «Nur Otan» partııasy fılıalynyń jáne Tilderdi damytý basqarmasynyń uıymdastyrýymen Memlekettik tilde án salatyn etnomádenı birlestikter jastarynyń festıvali bolyp ótti. Festıvl el Táýelsizdiginiń 25 jyldyǵyna arnaldy. Festıvaldiń maqsaty–ózimizdiń jastardy da, ózge jastardy da otansúıgishtikke tárbıeleý, azamattyq jaýapkershilikti nyǵaıtyp, memlekettik til – qazaq tiliniń qoldanys aıasyn keńeıtý, nasıhattaý. El Táýelsizdiginiń 25 jyldyǵyna arnalǵan bul konsertke 17 etnomádenı birlestiktiń jastary qatysyp, oryndaýshylyq sheberlikteri men horeografııalyq, ártistik qabiletterin kórsetti. Jastar qazaqtyń halyq ánderin, osy kúngi jańa áýenderdi shyrqady. Konsert zalynda otyrǵan kórermen ózge ult ókilderiniń týǵan el, jer, Otan, qazaq dalasy jaıly patrıottyq ánderin tyńdap, qýana qýattap, kóńil sergitti. Ásirese, «Kympıtsorı» koreı jas­tarynan quralǵan vokaldyq top, Fınn-ýgor jastary Batyrhan Shúkenov oryndaıtyn «Otan Ana», ázerbaıjan jastarynyń «Dániz» vokaldyq ansambli, «Qazaǵym-aı», armıandardyń «Erebýnı toby «Týǵan jer – taǵdyrym», belorýstardyń «Nadzeıa» toby «Táýelsiz el», bolgarlardyń «Lazarkı» ánshileri Marjan Arapbaevanyń repertýaryndaǵy «Qazaq eli osyndaı», grekterdiń «Qardes» toby «Mıllıony nas – Qazaqstanym tek alǵa», evreılerdiń «Anahný» toby «Tek alǵa», karachaı-cherkes pen kabardın-balqardyń «Teberda toby «Qazaǵymsyń», nemisterdiń «WIR» halyq ansambli «Qazaǵym- aı», slavıandardyń «Iаrılo» toby «Gúlistan Qazaqstan», tatar-bashqurttardyń «Mıras» toby «Qorqyt», ózbek jastary «Dýstlık Kaıot», «Týǵan jer», «Qońyr» toby repertýarynan ánder, ýkraındardyń «Kalynovo namysta» toby «Týǵan elim», cheshen-ıngýshtardyń «Illı» vokaldyq toby «Qazaqstan» atty belgili qazaq ánshileri men estradalyq toptar oryndaıtyn patrıottyq ánderdi oryndady. Bul kúnderi Dostyq úıinde 23 oblystyq etnomádenı birlestik, oblystyq Assambleıasynyń jas­tar birlestigi, ulttyq órkendeý mektebi, «Ana tili» tilderdi damytýdyń oqytý-ádistemelik ortalyǵy, «Qazaq tili» qoǵamy ornalasqan. Sonymen qatar, 20 etnostyń mádenıetin dáripteıtin 42 shyǵarmashylyq ujym jumys isteıdi. Aýdandarda Assambleıanyń 13 fılıaly, aýyldardy qosqanda 83 etnomádenı birlestik jumys is­teýde. Al ortalyq Assambleıada biz­diń oblystan qyzmet jasaıtyn 18 et­nomádenı birlestik ókilderi bar. Sultanmahmut Toraıǵyrov atyndaǵy memlekettik ýnıversıtet janynda Assambleıa kafedrasy, jergilikti fılıalda etnolıngvıstıkalyq mektep ashyldy. Qazir bul mektepte ózge ult ókilderiniń ul-qyzdary bilim alatyn, óz ana tilderin úırenetin 16 ulttyq oqý bólimi bar, jyl saıyn 500-den astam oqýshy bilim alady. Sonymen birge, Elına Paýlı basqaratyn «Jastar birlestiginiń úılestirý keńesi» tirkelgen. Keńestiń basty mindeti, aty aıtyp turǵandaı, ózge ult ókilderinen quralǵan jastar birlestikterimen jumys jasaý. Birlestikter óz ana tilderimen qatar, qazaq tilin úırenip, qazaqstandyq otan­súı­gishtik qasıetti nyǵaıtýǵa úles qosýda. О́zge ult ókilderi birlik, dos­tyq maqsat-múddesi úshin birge jınalyp, toptasýda. Bul – Assam­bleıa qurylǵaly ótken aradaǵy 20 jyldyń jemisi, jeńisi. «Bul festıvalǵa qatysqanyma qýanyshtymyn. Kórermen bizdiń ónerimizdi jyly qabyldady. Mundaı konsertter jıi bolsa ǵoı. Barlyq qazaqstandyqtardy kele jatqan Táýelsizdik merekesimen quttyqtaımyn», – dedi «Merkaz» oblystyq evreıler ortalyǵynyń múshesi Dmıtrıı Nazarenko. Farıda BYQAI, «Egemen Qazaqstan» PAVLODAR Sýretti túsirgen Maqsat AITBAI