Qostanaıda zeınet jasyna deıin qujatsyz ómir súrgen turǵyn anyqtaldy

Qostanaı oblysynda sot ókilderi zeınettik jaqsa deıin birde-bir qujatsyz ómir súrgen áıeldi anyqtady, dep habarlady «QazAqparat» oblystyq sottyń baspasóz qyzmetine silteme jasap. Qostanaı oblysynyń Altynsarın aýdanynyń turǵyny Ámına Káýkenova óziniń týýyna baılanysty anyqtalǵan zańdyq fakti boıynsha sotqa qaıyryldy. Qujattar turǵynǵa zeınettik jasqa kelgendigin tirkep, kópbalaly ana retinde járdemaqy alý jáne QR azamaty retinde barlyq quqyqtarynyń saqtalýyn qamtamasyz etý maqsatynda kýálik alý úshin kerek bolǵan. Á.Káýkenova 1952 jyly 22 mamyrda Qostanaı oblysy, Jangeldi aýdanynda týǵan. Bul týraly ol óziniń ata-analary men týǵan týystary arqyly biletin bolyp shyqty. Ol aýdanǵa 1970 jyldary kelgen. Á.Káýkenovany ata-anasy Altynsarın aýdanynyń Sverdlov aýylynyń turǵynyna ulttyq dástúr boıynsha turmysqa shyǵarǵan jáne ol osy ýaqytqa deıin atalǵan mekenjaıda turyp kelgen. Ol 6 balnyń anasy. Olardyń ekeýi múgedek. Al áıeldiń ózi bolsa saýatsyz, bilimi joq, eshqashan esh jerde jumys istemegen. Aýrýhanaǵa da eshqashan barmaǵan, týǵan kúnin sottan tys anyqtaý osy ýaqytqa deıin múmkin bolmapty. Qujatynyń joq bolǵandyǵyna baılanysty ony esh jerde eshkim qabyldamaǵan. Kórshileri men tanystary sotta onyń jasyn rastady. Buǵan qosa, áıeldiń tegi men týǵan kúni Altynsarın aýdanynyń Qara Myrza aýylyna qarasty Sverdlov aýyldyq keńesiniń muraǵat qorynda kórsetilgendigi belgili boldy. Altynsarın aýdandyq sotynyń sheshimine sáıkes, Á.Káýkenovanyń óziniń týǵan jylyn tirkeý týraly sotqa joldaǵan zańdyq ótinishi qanaǵattandyryldy. Sot sheshimi kúshine endi.