Baýyrjan Islamhan – premer-lıganyń úzdik oıynshysy

«Qaırat» fýtbol komandasynyń kapıtany Baýyrjan Islamhan premer-lıganyń úzdik oıynshysy atandy, dep habarlady vesti.kz. Kásipqoı fýtbol lıgasy QPL-2016 maýsymynyń úzdik oıynshysyn anyqtaý boıynsha saýalnamanyń qorytyndysyn shyǵardy. Buǵan elimizde óner kórsetetin komandalardyń basshylary, bas jattyqtyrýshylar jáne kapıtandar qatysty. Daýys berý kezinde árbir respondent qatysýshylar ishinen úzdik fýtbolshylardyń úsheýin atady. Birinshi oryn úshin úsh upaı, ekinshi orynǵa eki upaı, úshinshi orynǵa bir upaı berildi. Qorytyndysynda Baýyrjan Islamhan barlyǵy 46 upaı jınap, úzdik oıynshysy atandy.  Ekinshi oryn ótken maýsymdy «Ordabasy» sapynda bastap, «Astanada» altyn medaldarmen aıaqtaǵan Azat Nurǵalıevke berildi. Onyń enshisinde 27 upaı. Al úshinshi orynda – «Qaırat» shabýylshysy Jerar Goý. Ivýarııalyq ta 27 upaı jınady. Tórtinshi orynǵa «Ertis» oıynshysy Karlos Fonseka (15 upaı) jaıǵassa, úzdik bestikti «Qaırattyń» taǵy bir jartylaı qorǵaýshysy Andreı Arshavın (13 upaı) túıindedi.