Shókeev qandaı ulttyq kompanııalardyń satylatynyn aıtty

«Samuryq-Qazyna» qory óz quramyndaǵy «Eır Astana», «Qazaqtelekom», «QazAtomО́nerkásip», «QTJ», «QazMunaıGaz», «Samuryq-Energo», «Qazposhta» kompanııalarynyń aksııalaryn satylymǵa shyǵarmaq. Bul týraly búgin Úkimet otyrysynda qor basshysy О́mirzaq Shókeev habarlady. Onyń aıtýynsha, kompanııanyń negizgi aktıvteri IPO arqyly satylady. Bul sheshimdi Memleket basshysy qoldady. IPO-ǵa birinshi bolyp, «Eır Astana», «Qazaqtelekom», «QazAtomО́nerkásip» kompanııalary shyǵady. «Eır Astana» kompanııasy IPO-ny naryqtyń damýyna qaraı, 2017 jyldyń sońynda nemese 2018 jyldyń basynda ótkizýdi josparlaýda. Nátıjesinde kompanııa qolynda daýys berýshi aksııanyń 25+1 paketi qalady. Aksııanyń 51 paıyzy qazaqstandyq ınvestorlardyń qolynda qalýy tıis degen sheshim shyǵaryldy. «Qazaqtelekom» kompanııasy - ol qazirdiń ózinde 49 paıyzǵa jeke menshikte. Biz kompanııany IPO-ǵa kelesi jyldyń sońynda daıyndaýdy kózdep otyrmyz. «QazAtomО́nerkásip» kompanııasynyń IPO baǵdarlamasy 2018 jyly ótedi dep mejelenýde jáne onyń 25 paıyz aksııasy satylady. «QazMunaıGaz» kompanııasynyń IPO-sy da 2018 jyldyń basynda ótedi jáne 25 paıyz aksııasy saýdaǵa shyǵady. «Samuryq-Energo» kompanııasynyń IPO-sy 2019 jyly qýattylyq naryǵy tolyq kúshine engen kezde ótedi. Satylym kólemi aksııanyń 25 paıyzy dep qarastyrylýda. Aksııanyń 51 paıyzy saýdaǵa shyǵarylýy yqtımal. «Qazposhta» IPO-ny 2019 jyly 49 paıyzǵa deıin ótkizýi múmkin. «Qazaqstan temirjoly» kompanııasy jańǵyrtýdan keıin IPO-ny 2020 jyly ótkizýdi josparlaýda. Aksııanyń satylymǵa shyǵatyn kólemi - 25-49 paıyz. "Sonymen qatar biz qordyń endi ǵana ósip kele jatqan aktıvteri «Qazaq Eır» men «Taý-ken Samuryq» kompanııalaryn saýdaǵa shyǵaramyz", - dedi ol. Onyń aıtýynsha, jekeshelendirýge jatatyn qor aktıvteriniń tiziminde 217 nysan bar, onyń iri aktıvter kórsetilgen birinshi bóliginde 44 nysan bar bolsa, ekinshisinde - 173 aktıv bar. «Birinshi tizimdegi 44 aktıvterge toqtalatyn bolsaq, 11 aktıv boıynsha memlekettik komıssııanyń sheshimi shyǵaryldy», - dedi О́. Shókeev. Olardyń qatarynda QTJ, QazMunaıGaz, Samuryq-Energo kompanııalarynyń - «Transtelekom», «EýrazııaEır», «Mańǵystaý REK», «ShQO REK», Aqtóbe JES, TeńgizMunaı syndy aktıvteri bar. "Bul nysandar ashyq satylym arqyly saýdaǵa túsedi. «Transtelekom», «EýrazııaEır» boıynsha jaqyn arada habarlandyrý bolady. «Qazaqstan temirjoly» kompanııasynyń tórt aktıvi - «Lokomotıv qurastyrý zaýyty» AQ, «Elektrovoz qurastyrý zaýyty» AQ, «Tulpar-Talgo» AQ, «KTZE - Khorgos Gateway» kompanııasy tikeleı «General Electric», «Alstom», «Talgo», Lıanıýngan porty syndy kompanııalarǵa satylady. Eki nysan 2016 jyldyń sońynda, qalǵan ekeýi 2017 jyldyń birinshi jartyjyldyǵynda satylady dep josparlap otyrmyz. Olardyń satylymynan túsetin jalpy soma - shamamen 400 mlrd. teńge", - dep atap ótti qor basshysy.