Jeńil atletıka federasııasynyń prezıdenti saılandy

Astanada Qazaqstan Jeńil atletıka federasııasynyń esep berý-saılaý konferensııasy boldy. Onda federasııanyń jańa prezıdenti bolyp Qazaqstan Respýblıkasy Prezıdenti Ákimshiliginiń Basshysy Ádilbek Jaqsybekov saılandy. Konferensııa jumysyna Mádenıet jáne sport mınıstri Arystanbek Muhamedıuly, son­daı-aq federasııa prezıdıý­mynyń músheleri, aımaqtyq fılıaldar jetekshileri, qurama jattyqtyrýshylary, Ulttyq Olımpııalyq komıtet ókilderi qatysty. Jıynǵa qatysýshylar federasııanyń esepti kezeńdegi jumystary  týraly esepti baıandamany tyńdap, uıymnyń jarǵysy men basqarýshy quramyn bekitti. Jınalǵandar aldynda sóz sóılegen Ádilbek Jaqsybekov federasııa jumysyndaǵy basym baǵytty sporttyń bul túrin jappaı damytýdan jáne jeńil atletıkamen shuǵyldanýshylar úshin ınfraqurylym daıyndaýdan kórip otyrǵanyna nazar aýdardy. Ádilbek Ryskeldiuly 2007 jylǵy tamyzdan 2014 jylǵy jeltoqsanǵa deıin Qazaqstan Fýtbol federasııasyn basqardy. Ol bul qyzmetten sol jylǵy qazanda Astana qalasynyń ákimi bolyp taǵaıyndalýyna baılanysty ketti. Budan keıin, 2015 jylǵy maýsym – tamyz ara­lyǵynda «Astana EKSPO-2017» aksıonerlik qoǵamynyń basqarma tóraǵasy boldy. Al 2016 jylǵy maýsym aıynda Qazaqstan Pre­zıdenti Ákimshiliginiń Basshysy bolyp taǵaıyndaldy. Osy rette aıta ketýimiz kerek, Jaqsybekov sondaı-aq Qazaqstan Ulttyq Olımpııalyq komıtetiniń jazǵy sport túrleri boıynsha vıse-prezıdenti bolyp tabylady. «Egemen-aqparat»