Ásem áýez

Ońtústik Qazaqstan oblystyq opera jáne balet teatrynyń belgili solısi, mádenıet qaıratkeri Úralhan Seıilbekova el Táýelsizdiginiń 25 jyldyǵyna oraı «Ánim saǵan, nurly elim!» shyǵarmashylyq keshin ótkizdi. Sońǵy jyldary otandyq opera óneri nebir jarqyn esim­dermen tolyǵa túsýde. Roza, Bıbigúl, Nurjamal, Maıra syndy halqymyzdyń dara týǵan sańlaq juldyzdary kóshin jal­ǵastyrýshy jastardyń arasynan Ú.Kanalbaıqyzynyń ónerin aıryqsha atap ótken jón. О́ıtkeni, ol óńirdegi opera jáne balet teatryn­da basty partııalardy som­dap júrgen birden-bir solıst. Halyq Úralhannyń ashyq tem­bri men jumsaq daýysyn joǵary baǵalaıdy. Onyń ásem vo­kaly, operalyq jáne konserttik reper­týardy tańdaýdaǵy oıly izdenisteri, ol beınelegen árbir obraz qazaq opera ónerine ózindik órnek bolyp qosylýda. Keshtiń joǵary deńgeıde ótýine qoldaý bildirýge dostary, túrli sahnalarda juptasyp óner kórsetip júrgen ánshiler qonaq retinde qatysty. Olardyń arasynda О́zbekstannyń eńbek sińirgen artısi, tanymal barıton Jeńisbek Pııazov, «Astana Ope­ra» teatrynyń jetekshi so­lısi, Qazaqstannyń eńbek sińir­­gen qaıratkeri Dına Ham­zına, Qazaqtyń memlekettik aka­demııa­lyq Abaı atyndaǵy opera jáne balet teatrynyń solısteri, ha­lyqaralyq baıqaýlardyń laýreaty Elena Nıkonova men Emıl Saqaýov jáne oblystyq opera jáne balet teatrynyń solısi Erlan Jan­darbaı bar. Keshke qatysýshylar opera jul­dyzymen birge ulttyq jáne álemdik klassıkanyń in­jý-mar­jan­darynan úzindiler shyr­qady. Ha­lyqaralyq baıqaýlardyń laý­reaty, Abaı atyndaǵy opera jáne balet teatrynyń dırıjeri, maestro Erbolat Ahmedıarovtyń, oblystyq opera jáne balet teatry­­nyń bas dırıjeri Qýanysh Is­maıylovtyń jetekshiligimen teatrdyń sımfonııalyq orkestri men Sh.Qaldaıaqov atyndaǵy fılar­­monııanyń «Súgir» ult-as­paptar orkestri óner kórsetti. S.Mu­ha­medjanovtyń «Shattyq Otany» kom­pozısııasy, E.Rah­madıevtiń «Qamar sulý» opera­synan Qamardyń arııasy oryn­daldy. Sımfonııalyq or­kes­trdiń súıemeldeýimen án shyr­qaǵan qyzdar hory men balet trýppasynyń óneri kesh ajaryn ashty. Ulttyq klassıkanyń «altyn qorynan» A.Jubanov pen L.Hamıdıdiń «Abaı» operasynan «Ajardyń arııasy», M.Tólebaevtyń «Qozy Kórpesh –Baıan sulý» operasynan «Baıannyń arııasy», «Birjan – Sara» operasy­nan «Aıtys», E.Rahmadıevtiń «Qa­mar sulý» operasynan Qamar men Ahmettiń dýeti, L.Hamıdıdiń «Bul­bul», Sh.Qaldaıaqovtyń «Ana týraly jyr» ánderi, sondaı-aq,  Verdıdiń «Vıolettanyń arııa­sy», Sh.Gýnonyń «Romeo já­ne Djýletta» operasynan «Djýlet­tanyń valsi», L.De­lıbtiń «Lakme» jáne R.Leon­kovallonyń «Paıasy» operasynan «Nedda men Sılvıo» dýetteri óte sátti oryndaldy. Quramynda Emıl Saqaýov, Elena Nıkonova, Erlan Jandarbaı bar toppen birge Dj.Verdıdiń «Rıgoletto» operasynan úzindi shyrqaldy. Oblystyq mádenıet basqar­masynyń basshysy N.Ahmetjanov ánshige oblys ákimi J.Túıme­baev­tyń jáne oblystyq máslı­hat­tyń alǵys hattaryn tabys etti. Ú.Seıilbekovanyń oryndaýyn­da­ǵy partııalardyń qaı-qaısysy da shoqtyǵy bıik týyndylar desek, al, onyń ásem áýezi men keń tynysty erekshe úni kórermenin tez baýrap áketedi. Indıra ARTYQBAEVA