Ulttyq kitaphanada belgili ǵalym, qoǵam qaıratkeri, akademık, Memlekettik syılyqtyń laýreaty Orazáli Sábdenniń qazaq, orys jáne aǵylshyn tilderinde jazylǵan «Abaı, Qazaqstannyń bolashaǵy jáne álemdik sıvılızasııa», sondaı-aq, ǵalym Ábdimálik Áshirovpen birlese jazǵan «HHI ǵasyr jáne sodan keıingi ǵasyrdaǵy adamzattyń ómir súrý strategııasynyń konsepsııasy» atty kitaptarynyń tusaýkeseri ótti.
«Abaı Qunanbaıulynyń shyǵarmalary men qara sózderi qazaq halqyn ǵana emes, búkil adamzat balasyn eki ǵasyr boıy rýhanı qundylyqtarǵa jeteleýmen keledi. Biz Abaıǵa qaıta bet buryp, onyń týyndylarynan aqıqat pen shyndyqty, ar-uıat, namys pen meıirimdilikti alyp, ózimizdi ózgertsek, rýhanı jan dúnıemizdi túzetýge bet alsaq», – degen avtor kitapta Abaıdyń qara sózderinde kóterilgen máselelerdi XXI ǵasyrda iske asyrý tetikterin aıqyndaı otyryp, qazaq eline, jalpy órkenıetke eleýli úles qosqan ál-Farabı, Muhammed Haıdar Dýlatı, Abylaı han, Dinmuhamed Qonaev syndy otyzǵa tarta tarıhı tulǵa jaıly qysqasha məlimet usynady.
«Abaı, Qazaqstannyń bolashaǵy jáne álemdik sıvılızasııa» kitabynyń avtory halyqaralyq deńgeıdegi jańa postmodernızm tásilinde búgin men bolashaqtyń ózekti suraqtaryna jaýap berip, olardy qalaı iske asyrý joldaryna toqtalyp, qazaq elin jańa órkenıetke, izgilendirý qoǵamyna kóterýdi maqsat tutady.
Sondaı-aq, bıylǵy qarashanyń sońyn ala Londonda ótken V halyqaralyq «Open Eurasian Literature festival & Book forum» ádebıet festıvali aıasynda Orazaly Sábden men Ábdimálik Áshirovtiń «The Conceptual Strategy for Humankind›s Survival in the XXI Century and Food Security» («HHI ǵasyr jáne sodan keıingi ǵasyrdaǵy adamzattyń ómir súrý strategııasynyń konsepsııasy») kitabynyń kórsetilimi ótken edi. Álemniń 67 eline tanystyrylǵan kitaptyń avtorlary adamzattyń nazaryn XXI ǵasyrdaǵy jahandyq máselelerge aýdaryp jáne olardy sheshýdiń biregeı baǵdarlamasyn usyndy. Munda postındýstrııalyq álemdegi jalpy adamzat órkenıetiniń rýhanılyq, ǵylymı-tehnıkalyq revolıýsııa, ekonomıka jáne álemdik qaýipsizdik, ekologııa, ǵaryshty ıgerý syndy 6 bazalyq elementke negizdelgen planetarlyq úı qurý qaǵıdalary sıpattalady. Qos avtor adamzat ómirindegi kúrdeli máselelerdiń biri – ashtyqqa dýshar bolǵan álemde 1,3 mıllıard adamdy azyq-túlikpen qamtamasyz etý máselesin tájirıbelik turǵyda sheshýdi usynady.
Mıra BAIBEK,
«Egemen Qazaqstan»
ALMATY
