Úıreteri bar úlgili bastama

Muǵalim bolyp qyzmet etý – bizge júktelgen úlken mindet. Ata-anasynan keıin ul men qyzdy jaqsy azamat etip shyǵarý ustaz paryzy. О́ıtkeni, ár shákirt óziniń áke-sheshesinen keıin muǵalimin maqtan etedi. Onyń qyzmetine rızalyǵyn bildiredi. Osy turǵydan kelgende ustazdyq qyzmettiń abyroıly ekenin túsiný qıyn emes. Men de muǵalim bolýdy mektepte júrgende oıladym. Sebebi, ol kezde árbir pán muǵalimine degen bizdiń iltıpatymyz bólek edi. Kósh jerden kórgende kútip turyp sálem beretinbiz. Osy shaǵyn maqalamdy jazýǵa «Egemen Qazaqstan» gazetinde ár aptanyń sársenbisinde berilip kele jatqan, ustazdarǵa arnalǵan «Tálim» arnaıy betin oqyǵannan keıin bekin­dim. Jarııalanǵan maqalalar meni de oı­lan­dyrdy. Ásirese, ustaz mártebesin kóterý týra­ly tolǵamdar bizdiń О́.Jańabaev atyndaǵy orta mektep ujymynyń da kóńilinen shyqty. Basty aıtpaǵym, men de geografııa páninen biraz jyldan beri oqýshylarǵa sabaq berip kele jatyrmyn. Aýylda tursaq ta balalardy oqytýǵa barlyq jaǵdaılar jasalǵan. Osyny tıimdi paıdalaný úshin óz pánime ár kúni jan-jaqty daıyndalamyn. Taıaýda Elbasy Nursultan Nazarbaevtyń «Uly Dala ulaǵattary» degen eńbegin gazetten oqydyq. Sol shyǵarmanyń «El men er jáne jer» atty bólimindegi «Jerden ótken baılyq joq: jer bolsa – el bolady, el bolsa – er bolady», degen ataly sóz oıǵa qaldyrdy. Shynynda, ár kúngi taqyrypty aldymyzda otyrǵan ul men qyzǵa bildire otyryp, sol el men jerdi tanytý jaǵyna da basa nazar aýdarý kerektigin túsindim. Meniń pánimniń ózi sol el men jer týraly. Aınalamyzdaǵy tabıǵattyń ásem kórinisin, ony qorǵaý, bar baılyǵyn paıdalana bilý, ekologııasyn taza saqtaý jaıyn oqýshynyń sanasyna sińirip otyrýdy paryz sanaımyn. Eli men jerin, tarıhyn, qasıetti táýelsizdigin jete bilgen oqýshynyń oı-sanasy bıik bolady. Osy jerde ulttyq tárbıeni ulttyq pedagogıkamen ushtastyryp otyrýdyń da jóni bólek dep bilemin. Men bul arada oılarymdy jalpylama aıtyp otyrmyn. Bolashaqta ár taqyrypqa toqtalý nıetim bar. Sol arqyly áriptesterimmen pikir almassam deımin. Bizge osyndaı múmkindik jasap otyrǵan basy­lymǵa rızashylyǵym sheksiz. Ásirese, ustaz týral­y uly tulǵalardyń aıtqan taǵylymdy sóz­deri de tájirıbeli muǵalimderdiń pikirleri de kó­ńil­den shyǵýda. Biz ony oqyp qana qoımaı, táji­rıbe bólisip otyrsaq, nur ústine nur bolady. Jańalyq YDYRYSOVA, О́.Jańabaev atyndaǵy orta mekteptiń geografııa pániniń muǵalimi Almaty oblysy, Raıymbek aýdany