Táýelsizdik toıy qarsańyndaǵy tolaǵaı tabystar

Jalpyulttyq telekópirde elimiz boıynsha 23 kásiporyn iske qosyldy Keshe Astana qalasynda Memleket basshysy Nursultan Nazarbaevtyń qatysýymen dástúrge aınalǵan Jalpyulttyq telekópir ótti.  Otandyq kásipkerlerdiń tól merekesi Indýstrııalandyrý kúnine arnalǵan shara barysynda jıyrma úsh jobanyń tusaýy kesildi. Prezıdent telekópir rejiminde jańa nysandardy iske qosyp, ındýstrııalandyrý aıasyndaǵy jobalar qurylysynyń bastalýyna belgi berdi. Sonymen qatar, Táýelsizdiktiń 25 jylyndaǵy ındýstrııalyq damýdyń negizgi kezeńderine arnalǵan fotosýret kórmesin tamashalady. Sóz basynda aıta ketken jón, ındýstrııa­landyrý baǵdarlamasyn júzege asyrý jyldarynda 4,6 trln teńgeniń 961 jobasy iske qosylyp, 90,6 myń turaqty jumys orny ashylǵan. Tek jyl basynan beri 179,2 mlrd teńgeniń 63 jobasy júzege asyrylyp, 4,8 myńnan astam turaqty jumys orny quryldy. Al baǵdarlama aıasynda qolǵa alynǵan jobalar arqyly 7,5 trln teńgeniń shamasynda ónim óndirilse, onyń 1,8 trln teńgesi sońǵy on aıǵa tıesili. Sonda jobalardy iske qosý arqyly aı saıyn ortasha eseppen 160 mlrd teńge kóleminde ónim óndirilgen.

Domna peshiniń  kórigi qyzady

Keshegi telekópirde iske qosylǵan óndirister joǵarydaǵy sandardy taǵy eseleı túsetini sózsiz. Solardyń birqatary jaıynda baıandasaq, Elbasy qamqorlyǵymen jáne bastamasymen qanat qaqqan mańyzdy jobalardyń qatarynda «Arselor Mıttal Temirtaý» AQ bar. Nursultan Nazarbaev eńbek jolyn bastaǵan Qaraǵandy oblysyndaǵy nysannyń jańǵyrtylǵan №4 domna peshi jumysyn bastady. Telekópirde mekemeniń jóndeý jónindegi dırektory Vadım Basın jańa keshen bıyldyń ózinde 4 mln tonna bolat óndirýge múmkindik bergenin aıtty. «Bul ótken jylǵy deńgeıden 15 paıyzǵa joǵary. Metallýrgtar Sizdiń óndiris kólemin jylyna 6 mln tonna bolatqa deıin arttyrý jónindegi tapsyrmańyzdy oryndaý maqsatynda jumys isteýde», dedi ol. Basqosýda Elbasy Astana qalasyndaǵy «Selena Insulations» JShS qurylys materıaldaryn shyǵaratyn zaýytty iske qosty. Zaman talabyna saı nysannyń ónimderi úılerdi jylytýǵa arnalǵan. «Taýarlarymyzdyń 40 paıyzy Reseı men Ortalyq Azııaǵa eksporttalady. Qazirgi kezde zaýytta 70 adam eńbek etedi», degen JShS dırektorlar keńesiniń tóraǵasy Kshıshtof Domareskı Prezıdentti el Táýelsizdiginiń 25 jyldyǵymen quttyqtady. «Memleket basshysynyń arqasynda Qazaqstan Ortalyq Azııadaǵy básekege qabiletti el boldy. Biz ekonomıkamyzǵa úlesimizdi qosyp, Qazaqstan men Polsha arasyndaǵy áriptestiktiń jandanýyna atsalysyp jatqanymyzǵa qýanamyz. Zaýytty iske qosýǵa ruqsat berińiz», dedi sóziniń sońynda. Elbasy óz kezeginde eki el arasyndaǵy áriptestik týraly sóz qozǵady. «Men bıyl Polshaǵa resmı saparmen baryp qaıttym. Sol kezde eki eldiń áriptestik baılanysyn arttyrý maqsatynda kelissózder júrgizdik. Bul – jaqsy úlgi. Sizderde bızneske jáne qurylysqa jaqsy jaǵdaı jasalǵan dep úmittenemin», dedi N.Nazarbaev. Indýstrııalandyrý kúni aıasyndaǵy sharada Aqtóbe oblysyndaǵy turǵyn úı qurylysyn damytýǵa baǵyttalǵan kásiporyn ashyldy. Jańa kombınatta germanııalyq «Wekcenmann» kompanııasynyń úzdik jabdyqtary ornatylǵan. Kásiporyn ónimi birinshi kezeńde jylyna 50 myń sharshy metr baspana turǵyzýǵa múmkindik beredi eken. «О́ndiriske 3 mlrd teńgege jýyq qarjy ınvestısııalandy. Zaýyttan shyqqan ónim qurylystyń ózindik qunyn 15-20 paıyzǵa tómendetedi. Bul sonymen qatar, qurylys merzimin eki esege qysqartady», dedi «Úı qurylysy kombınaty» JShS quryltaıshysy Nurken Turbaev. Elbasy Astana, Almaty, Shym­kent sekildi Aqtóbe de elimizdegi megapolısterdiń biri ekenin aıtyp, sáýletti úıler salýdy tapsyrdy. «Bul óndiristi iske qosý óte mańyzdy. Aqtóbe Qazaqstannyń eń damyǵan megapolısteriniń biri bolýy qajet. Sondyqtan turǵyn úı qurylysyna erekshe nazar aýdarylýda. Qazir osy salaǵa qarjy bólinip jatyr. Qalanyń janynda jańa shaǵyn aýdan salynýda. Degenmen, buǵan deıin birneshe ret eskertkenimdeı, birtektes, tartymsyz úılerdi emes, sáýletti ári ádemi nysandardy salyńdar», dedi N.Nazarbaev.  

Jeńil ónerkásip  jelkenin jaıdy

Telekópirdiń taǵy bir jańalyǵy, Prezıdent aıaq kıim óndirisimen aınalysatyn  «Kazlegprom Almaty» fabrıkasyn iske qosty. Osy tusta Elbasy atalǵan ónerkásiptiń ónimin satyp alǵanyn aıtyp, jurtshylyqty, qazaqstandyqtardy óz taýarlarymyzdy tutynýǵa shaqyrdy. «Men otandyq ónimderdi qoldaý qajet­tigin únemi aıtamyn. Osy salany ári qaraı damyta berińder, básekege saı bolyp, ónimderiń Italııa, Fransııa taýar­larynan kem túspesin», dedi Memle­ket basshysy. Fabrıka dırektory A.Bek­turǵanovtyń aıtýynsha, kásiporyn aıaq kıimdi ıtalııalyq tehnologııa boıynsha shyǵarady. «Baıan sulý» fabrıkasynyń pechene shyǵaratyn óndirisi de Prezıdenttiń ruqsatymen iske qosyldy. О́nimdiligi óte joǵary zamanaýı qural-jabdyq jylyna 5 myń tonnadan astam ónim shyǵarýǵa múmkindik beredi eken. Mekeme jetekshisi Tımýr Sadyqovtyń aıtýynsha, fabrıka ónimi Reseı, Germanııa, Qytaı, Mońǵolııa, О́zbekstan, Ázerbaıjan elderine jetkizilýde.  «Jańa jeli iske qo­sylǵannan keıin eksportqa ónim shy­ǵarý 40 paıyzǵa arttyrylady», dedi ol. Nursultan Nazarbaev telekópirde bekire ýyldyryǵyn óndiretin keshenge sáttilik tiledi. Batys Qazaqstan obly­sy­nan tikeleı efırge shyqqan «Akvamá­denıet­ter tájirıbelik-ónerkásiptik oqý-ǵylymı kesheni» JShS aksıoneri Qaırat Mámıev bekire ýyldyryǵyn jańa tá­silmen alyp, óńdeıtinderin aıtty. «Biz bekire balyǵy men onyń qara ýyldy­ryǵyn óndiremiz. Nysan jańa zaman talaptaryna laıyqtalǵandyqtan, balyq shabaǵynyń ósýine erekshe jaǵdaı jasalǵan», dedi Q.Mámıev. Onyń aıtýynsha, ónim halyqaralyq dárejede sertıfıkat alǵan. Qazirgi kezde eksportqa shyǵarylady.

Joldar jelisi qurlyqtardy jalǵaıdy

Telekópirde «Qazaqstan temir jo­ly» ulttyq kompanııasynyń Almaty men Mańǵystaý oblystaryndaǵy bólim­sheleri baılanysqa shyqty. QTJ ókil­deriniń aıtýynsha, «Nurly jol» baǵdar­lamasy aıasynda «Almaty – Shý» baǵytyndaǵy ekinshi joldyń qurylysy aıaqtalǵan. Sondaı-aq, bıylǵy tamyzda tanystyrylǵan otandyq jańa úlgidegi keń qorapty jolaýshylar vagondary sertıfıkattaý synaǵynan ótti. Iаǵnı, olar da paıdalanýǵa daıyn. Keshe alǵashqy jolaýshylary bar «Tulpar-Talgo» quramy «Almaty – Shý» jańa temir jol jelisimen jolǵa shyqty. Sharada Quryq parom portynyń mańyzy týraly da aıtyldy. Mundaǵy temir jol men port ınfraqurylymynyń qurylysy aıaqtalǵan. «Almaty – Shý» jańa temir jol jelisi poıyz qozǵalysyn eki esege ulǵaıtady. Biz muny burynnan josparlaǵanbyz. Al Quryq porty – Kavkaz ben Eýropaǵa shyǵatyn jol. Ol el úshin, onyń damýy jáne ındýstrııalandyrý úshin asa qajetti joba», dedi Elbasy. Osy kúni Almaty jáne Qaraǵandy oblystaryndaǵy mańyzdy joldar paıdalanýǵa berildi. «Almaty – Qap­shaǵaı tas joly – «Ortalyq – Ońtús­tik» dáliziniń basym bóligi. Qazir jol­dyń bul bóligindegi qurylys jumys­tary tolyq aıaqtaldy. Alty jolaqty qozǵa­lysqa arnalǵan ári birinshi tehnıkalyq ka­tegorııanyń barlyq talaptaryna saı. Búginde joldaǵy kólik qozǵalysynyń qar­qyny táýligine 30 myńǵa deıin artty. Al jol-kólik apattary 3 ese azaıdy. Joldyń uzyndyǵy 30 shaqyrymdy quraıtyn sońǵy bóligi paıdalanýǵa daıyn», dedi «Qaz­AvtoJol» ulttyq kompanııasy bas­qarma tóraǵasynyń orynbasary Berik Jel­dikbaev. Telekópir arqyly Qaraǵandy oblysynan baılanysqa shyqqan kompanııanyń basqarma tóraǵasy Ermek Qızatov Táýelsizdik mereıtoıy qarsańynda Almaty – Qorǵas, Almaty – Taldyqorǵan, Beıneý – Shetpe, Kókshetaý – Petropavl, Shymkent – Tashkent, Shymkent – Jambyl oblystary shekaralaryndaǵy 930 shaqy­rym jańa joldar paıdalanýǵa berilgenin habarlady.  Al Astana – Temirtaý jolynyń 169 shaqyrymy tolyqtaı aıaqtalyp, kólik qozǵalysyna ruqsat etilgen. «Astana – Temirtaý joly birinshi tehnıkalyq sanat normatıv­terimen salyndy. Onyń ótkizý qabilet­tiligi táýligine 6-dan 28 myń kólikke deıin ulǵaıtyldy. Astana – Temirtaý jáne Almaty – Qapshaǵaı tas joldary iske kosylýǵa daıyn. Qozǵalysty bastaýǵa ruqsat suraımyz», dedi E.Qızatov. Memleket basshysy Nursultan Nazarbaev elimizdegi «Nurly jol» baǵdar­lamasy qazirgi daǵdarysqa qarsy úlken joba bolyp sanalatynyn eske salyp ótti. «Aldymyzdaǵy 5 jyldyń ishinde dál osyndaı 7 myń shaqyrym jol sal­saq, sonymen qatar temir joldar jeli­sin keńeıtsek, bul elimizge óte paıdaly ári ekonomıkany ári qaraı órkendetedi. Osynyń barlyǵy – memlekettiń atqaryp jatqan sharýa­sy. Sondyqtan sizder – elimiz úshin negizgi isti jasap jatqan adamdarsyzdar. Osy baǵytta bólingen qarajatty muqııat paıdalanyp, elimizde eń jaqsy joldardy salýǵa qyzmet etińizder», dedi Prezıdent. Indýstrııalandyrý kúni aıasynda Ekibastuz – Shúlbi sý elektr stansasy – О́skemen qýat jetkizý jelisiniń Shyǵys Qazaqstandaǵy jańa bóligi tanystyryldy. «KEGOC kompanııasy «Nurly jol» baǵdarlamasy aıasynda 500 kV-tyq Soltústik – Shyǵys – Ońtústik elektr energııasyn tasymaldaý jelisiniń qurylysyn júrgizýde. Osy jobanyń birinshi kezegi 700 shaqyrym Ekibastuz – Semeı – О́skemen elektr  jelileri men 500 kV-tyq Semeı qosalqy stansasy jáne de úsh qosalqy stansalardy keńeıtý jumystary merziminen bir jyl buryn aıaqtaldy. Joba Shyǵys Qazaqstan oblysyn elektr energııasymen jabdyqtaý senimdiligine, óńirdiń ekonomıkasynyń damýyna  jáne jalpy  Qazaqstannyń energetıkalyq táýelsizdigin arttyrýǵa yqpal etedi», dedi kompanııanyń basqarma tóraǵasy Baqytjan Qajıev.

Irgeli jobalar, ilkimdi ister

Jalpyulttyq telekópir barysynda Qazaqstan Prezıdenti Nursultan Nazarbaevqa Atyraý munaı óńdeý zaýytyn jańǵyrtý jumystary tanystyryldy. О́z kezeginde Memleket basshysy munaı men gazdy qaıta óńdeý elimizdiń  basty maqsaty ekendigin atap ótti. «Sizderdiń zaýyttaryńyz eń iri ári óte qymbat joba sanalady. Biz ony sońyna deıin, ıaǵnı ekinshi kezegin de tolyqtaı aıaqtaımyz. Odan ári  Atyraý oblysynda munaı hımııasymen aınalysatyn bolamyz», dedi N.Nazarbaev. Jyldyq qýaty 25 mln tonna ken óndiretin Aqtoǵaı kombınaty da kópshiliktiń kózaıymyna aınaldy. Salynǵan ınvestısııalar kólemi 2 mlrd dollardan asatyn óndiriste 1500 adam jumys istemek. Muny iske qosý barysynda Qazaqstan Prezıdenti táýelsizdik alǵaly iske qosylǵan eń iri kásiporyn dep baǵalady. Telekópir barysynda Elbasy Almaty oblysyndaǵy shoıyn óndiretin zaýytty iske qosýǵa ruqsat berdi. «Tekeli kendi qaıta óńdeý kesheni» JShS dırektory Baqyt Shalbaevtyń aıtýynsha, jańa zaýyt ınnovasııalyq tásilmen 400 myń tonna ónim shyǵarýǵa qaýqarly. О́ndiriste qazaqstandyq shıkizat qoldanylady. Búginde zaýytta jabdyqtardy iske qosý jumystary tolyqtaı aıaqtaldy. О́z kezeginde Memleket basshysy Nursultan Nazarbaev jaqynda, atalǵan óndiriste qurylys jumystary júrip jatqan kezde keńinen tanysqanyn eske saldy. «Sol kezde Tekelide shaǵyn dom­na peshiniń salynǵanyna tańdanǵan edim. Bul qyzyqty joba qoldanbaly shoıyndy shyǵarady. Bul – óte jaqsy ári qajetti óndiris, adamdarǵa jumys oryndary ashylady. Sondyqtan tabysty bolyńyzdar!» dedi Prezıdent. Ońtústik Qazaqstan oblysyndaǵy «KARLSKRONA LC AB» JShS-niń bolat quıý óndirisi – irgeli joba­lar­dyń qatarynda. Elbasymen tikeleı baılanysqa shyqqan mekeme dırek­tory­nyń orynbasary Á.Úsenbaev kásip­oryn jumysyn baıandady. «Jańa ındýstrııa­landyrý» baǵdarlamasyn qoldaý maqsatynda, ónimdi elde barynsha shoǵyr­landyrý úshin bolat quıý óndirisi uıym­dastyryldy. Jańa zaýyt arqyly alys jáne jaqyn shet elderge eksport kólemin 40 paıyzǵa arttyramyz. Qazir kásiporyndaǵy jańa óndirisimiz iske qosylýǵa daıyn», degen JShS ókili zaýytta 58 jas maman jumys isteıtinin jetkizdi. Olardyń arasynda «Bolashaq» baǵdarlamasynyń túlekteri de bar eken.  

Indýstrııalandyrý isiniń ıgilikteri sheksiz

Jalpyulttyq telekópirde Memleket basshysy Nursultan Nazarbaev ındýstrııalyq damý elimizdiń ekonomıkasy úshin mańyzdy mindet bolyp sanalatynyn aıtty. «Biz ekonomıkany ártaraptandyrýǵa jáne shıkizattyq emes salany qarqyndy damytý jolyna qaraı aıqyn baǵyt ustandyq. Údemeli ındýstrııalyq-ınnovasııalyq damýdyń 2010-2014 jyldary iske asyrylǵan memlekettik baǵdarlamasy óz nátıjesin berdi. Jańa tarıhymyzda óńdeý ónerkásibi alǵash ret taý-ken ónerkásibine qaraǵanda jedelirek damı bastady», degen Prezıdent tıisti ınfraqurylymdy damytý baǵytynda aýqymdy jumystar atqarylyp jatqanyn áńgimeledi. «Senimdi energetıkalyq júıe quryp, shyǵystan batysqa jáne soltústikten ońtústikke deıingi kólik dálizderin qalyptastyrdyq, baǵdarlardyń ártúrli bolýyna jáne olardyń bir-birin ózara tolyqtyrýyna den qoıdyq. О́ńdeý ónerkásibiniń metallýrgııa, hımııa, munaı óńdeý, mashına jasaý jáne azyq-túlik óndirý sııaqty basymdyǵy bar salalaryna zor mán berilip otyr», dedi Memleket basshysy. Onyń aıtýynsha, ındýstrııalandyrý jyldary jalpy kólemi 4,6 trln teńge bolatyn 961 joba júzege asqan. 90,6 myń turaqty jumys orny ashylǵan, «Global 2000» tizimindegi otyzǵa jýyq transulttyq korporasııa iske tartyldy. Temir jol mashınalaryn jasaý salasy jańadan qalyptastyryldy. Eksporttyq jańa taýarlar, sonyń ishinde munaı ónimderi, akkýmýlıator, transformator, metallýrgııalyq jańa taýarlar, mashına jasaý ónimderi jáne basqa da kóptegen ónim túrleri shyǵaryla bastady. «Bizdiń elimizde mashına jasaý alǵash ret damı bastady. Men taıaý arada barsha qazaqstandyqtardyń elektromobılmen júrgenin armandaımyn. Olardyń baǵasy qoljetimdi bolady», dedi Qazaqstan Prezıdenti. Jalpyulttyq telekópirde sóıle­g­en sózinde Prezıdent Nursultan Nazar­baev saýda salasyn Syrtqy ister mınıstr­liginiń quramyna qosýdy usyndy.  «Syrt­qy saýda men ınvestısııa birge bolýy kerek. Bizde saýda bir mınıstrlikte, ınvestısııalar – basqa mınıstrlikte. Bireýdiń ár kompanııanyń sońynan júrip, el ıgiligine qyzmet etýge tartqany jón. Júıe­li jumys isteıtin elder osylaı jasaı­dy. Al bizde mundaı joq. Osymen naqty kim aınalysatynyn anyqtaýy­myz qajet. Múmkin, Syrtqy ister mınıstrligi Avstralııa, Kanada jáne basqa da kóptegen elderdegideı Syrtqy ister jáne saýda mınıstrligi bolýy kerek shyǵar? Al Indýstrııa mınıstrligi tek ındýstrııamen ǵana aınalysýy tıis. Árqaısysy óz isin bilgeni abzal. Biz mańyzdy jumysqa kedergi keltirmeýimiz qajet», dedi Memleket basshysy. Elbasynyń aıtýynsha, 2017 jyldan bastap mys pen alıýmınııdiń jáne qara metaldyń álemdik naryqtaǵy baǵasy kóteriledi. «Bizder úshin agrarlyq sektor óte mańyzdy ekendigin bilemin. Biz onymen jumys isteýge tıispiz. Ener­getıka men ınfraqurylym da mańyz­dy. Degenmen, ındýstrııalyq damý memlekettik baǵdarlamasyn qoldaý qa­jet jáne eń bastysy, aqshany qaıda jum­saý qajettigin bilý kerek», dedi N.Nazarbaev. Osy rette Prezıdent qarajatymyzdyń qazirgi ýaqytta kóp emestigin, degenmen, aldaǵy kúnge senim mol ekendigin basa aıtty. «Men 2017 jyly mys pen alıýmınıı jáne qara metall baǵasynyń kóteriletindigine jáne bizdiń kóńil kúıimizdiń jaqsaratyndyǵyna senimdimin. Qazir munaı baǵasy – 54 dollar. Bul da bizdi qanaǵattandyrady. Iаǵnı, qarjy paıda bolǵan kezde qarqyndy damý úshin ony ındýstrııalandyrý isine barynsha qoldanatyn bolamyz», dedi Elbasy. Memleket basshysy shara barysynda Dúnıejúzilik banktiń «Bıznes júrgizý jeńildigi» reıtınginde respýblıkamyz álemniń 190 eli arasynda 35-orynǵa kóterilgenin habarlady. Sonymen birge, jedel ózgerip jatqan zamanymyzda sandyq tehnologııalar aldyńǵy orynǵa shyqqanyn atap ótti. «Jańa jahandyq tehnologııalyq dáýirdiń bastalýymen birge eldi belsendi túrde ındýstrııalandyrý strategııalyq mindetke aınalyp otyr. Jalpy, biz júrgizip otyrǵan saıasat álemdik tájirıbege saı keledi, onyń barysynda ekonomıkanyń qazirgi jaı-kúıi de, jahandyq úrdister de eskerilýde», dedi Nursultan Nazarbaev. Elbasy memlekettiń pármendi qol­daýyna negizdelgen keń aýqymdy ındýs­trııalandyrý isi Qazaqstandy damyǵan elder qataryna qosýǵa, keshendi áleý­mettik máselelerdi sheshýge, sondaı-aq, halyqtyń turmys deńgeıin arttyrýǵa múm­kindik beretinin aıtty. Sońynda is-sharaǵa qatysýshylardy aldaǵy Táýel­sizdik kúnimen quttyqtady.  

«Paryz» kimge buıyrdy? «Altyn sapany» kim aldy?

Prezıdent Nursultan Nazarbaev Indýstrııalandyrý kúni aıasynda ótken Jalpyulttyq telekópirdegi sózinen keıin «Paryz» jáne «Altyn sapa» syılyqtaryn saltanatty jaǵdaıda tapsyrdy. Bıyl «Paryz» baıqaýynyń bas júldesine korporatıvtik áleýmettik jáne ekologııalyq jaýapkershilik qaǵı­dattaryn iske asyrýda joǵary nátıjege qol jetkizgen «AqsaıGazServıs» AQ ıe boldy. Kásiporyn basshysy Tilek Shektibaev joǵary marapatty Memleket basshysynyń qolynan aldy.   Jeńimpaz kompanııa áleýmettik baǵdarlamalardy júzege  asyrýǵa jyl saıyn 25 mln teńgege deıin qarjy bólip keledi. Kásiporyn turaqty túrde bilim berý, mádenıet mekemelerine qoldaý jasaýda, sondaı-aq, muqtaj adamdarǵa kómek kórsetý qoryna óz úlesin qosady. Qazaqstan Prezıdentiniń «Altyn sapa» syılyǵymen «Qazaqstan elektrolız zaýytynyń» prezıdenti R.Romanov, «AtyraýMunaıMash» JShS dırektorlar keńesiniń tóraǵasy S.Túgelbaev, «Hımfarm» AQ dırektory R.Baıǵarın marapattaldy. Osy jıynda «Qazaqstannyń úzdik taýa­ry» respýblıkalyq kórme-baı­qaýy­nyń dıplomanttaryna arnaýly dıplomdar tabys etildi. Baıqaý jeńimpazdary úsh atalym – «О́ndiristik maqsattaǵy úz­dik taýarlar», «Halyqqa arnalǵan úzdik taýarlar», «Eń úzdik azyq-túlik taýarlary» boıynsha anyqtaldy. Aıta ketken jón, bıyl «Altyn sapa» syılyǵyna 100-den astam kásiporyn úmitker bolǵan. Al «Paryz» baıqaýyna qatysýǵa elimizdegi 501 kásiporyn ótinim bergen eken. Ashat RAIQUL, «Egemen Qazaqstan» Sýretter Prezıdenttiń baspasóz qyzmetinen alyndy Sýretterdi túsirgen Erlan OMAROV