Túrkııa dollarsyzdandyrý saıasatyn qolǵa aldy

Túrkııada dollarsyzdandyrý saıasaty aıasynda budan bylaı eldegi barlyq tender tek túrik lırasymen ǵana júrgiziledi, dep habarlaıdy Haberler basylymy Túrkııa jekeshelendirý máseleleri boıynsha ákimshiligine silteme jasap. Tek endi qolǵa alynatyn tenderler emes, sonymen qatar qazir kelisimsharty daıyndalyp jatqan tenderlik saýda da tek ulttyq valıýtamen eseptesetin bolady. Stambýl bırjasy 2 jeltoqsan kúni barlyq operasııany lıramen júrgizip, jınalatyn qordy da tek ulttyq valıýtamen saqtaý týraly sheshim qabyldaǵan edi. Prezıdent Erdoǵan budan sál erterek el azamattaryn tek túrik lırasymen ǵana jumys istep, artyq aqshany da óz valıýtalarynda saqtaýǵa shaqyrǵan. Sonymen qatar Túrkııanyń saýda palatasy da atalǵan bastamaǵa qosyldy. Vedomstva basshysy Ibragım Chaǵlardyń aıtýynsha, el aýmaǵynda saýda palatasy tek túrik lırasyn qoldanbaq. Esterińizge sala keteıik, birer kún buryn Erdoǵan Túrkııanyń Reseımen, Qytaımen jáne Iranmen aradaǵy saýdasynda tek osy memleketterdiń valıýtasy qoldanylatynyn málimdegen edi.