Oblys ortalyǵyndaǵy «NurAqtóbe» shaǵyn aýdanynda 540 páterlik úsh toǵyz qabatty turǵyn úı paıdalanýǵa berildi. Táýelsizdiktiń 25 jyldyǵy qarsańynda kezegi kelgen alǵashqy 25 aqtóbelik otbasyǵa páter kiltteri saltanatty jaǵdaıda tapsyryldy. Páter kiltterin tapsyrý saltanatynda sóz alǵan oblys ákimi Berdibek Saparbaev jańa úıge qonystanýshylardy qýanyshty sátterimen quttyqtady. Elimiz egemendik alǵannan beri Memleket Basshysy Nursultan Nazarbaevtyń halyqtyń ál – aýqatyn arttyrýǵa, turmysyn jaqsartýǵa basa nazar aýdaryp kele jatqanyn atap ótti.
- Osy «NurAqtóbe» shaǵyn aýdany kúni keshe ǵana boı kótergen-di. Qazir qanshama jańa úıler salyndy. Mektepter, balabaqshalar, joldar salynyp, jaryqqtandyrý jumystary júrgizildi. Búgin mine, 540 páterlik úsh turǵyn úıge qonystaný bastaldy. Úkimetpen kelisip, osy jerden «Nurly jer» memlekettik baǵdarlamasy boıynsha turǵyn úıler salý kózdelýde. Turǵyn úılerdi tez de sapaly salyp bergen «Aqtóbe sáýlet» kompanııasyna, osy turǵyn úıden páter alýǵa jaǵdaı jasaǵan «Turǵyn úı qurylysy jınaq banki» AQ Aqtóbe fılıalyna rızashylyǵymdy bildiremin. Jalpy turǵyn úıge baılanysty barlyq baǵdarlamalar boıynsha bıyl 5 myń aqtóbelik otbasy baspanaly bolady,-dedi óńir basshysy.
Saltanatty sátte Qaraqalpaqstannan týǵan jerine orylǵan qandasymyz Jarylqasyn Tańbaev sóz alyp, osyndaı turǵyn úı salyp bergen Elbasyna alǵys sezimin jetkizdi, eldegi tynyshtyq pen tatýlyqty Nursultan Ábishulynyń sarabdal saıasatymen sabaqtastyrdy.
- Men Qaraqalpaqstannan kóship kelgen boıda kezekke turdym. 2013 jyly osy shaǵyn aýdandaǵy alǵashqy turǵyn úıden páterge qol jetkizdim. Qazir bul shaǵyn aýdan qanatyn keńge jaıyp, ósip keledi. Týǵan jerime kelgenime qýanyshtymyn. Halqynyń qamyn oılap, turmysyn túzeýge uıtqy bolyp otyrǵan Elbasyǵa myń rahmet, dúnıe turǵansha tursyn,-degen Jarylqasyn aqsaqal batasyn berip, jańa qonystanýshylarǵa qutty bolsynyn jetkizdi.
Sodan keıin sý jańa páter ıeleri oblys ákimi Berdáibek Saparbaevtyń, oblystyq máslıhat hatshysy Sánııa Qaldyǵulovanyń jáne qala ákimi Ilıas Ispanovtyń qolynan kiltterin alyp, qýanyshtaryn bólisti.
Turǵyn úıdiń kireberisine kerilgen kók lentany osy aýdannyń aqsaqaly Jarylqasyn Tańbaev pen ardaqty ana Esqalıeva qıdy. Jańa qonystanýshylar páterlerine kirip, kórip, jaryq ta keń bólmelerge kóńilderi toldy.
Satybaldy SÁÝIRBAI, «Egemen Qazaqstan».
Sýretterdi túsirgen Maksım Tokar.
Aqtóbe.
