Basqarma basshysy Igilik Áýbákirov: «Ruqsat alǵan sheteldik azamattar jumysqa ornalasqan kezde qujat boıynsha ınjener-mehanık bolyp kórsetilgenmen, atqaratyn laýazymy men bilimi týraly qujaty sáıkes kelmeıdi. Al álgi mekeme túrli syltaýlardy alǵa tartyp, jergilikti jumysshylardy qyzmetke qabyldamaıdy. Tipti, ruqsat almastan emin-erkin eńbek etip júrgender bar. Tekseris qorytyndysynda týrıst bolyp kelip, nápaqa taýyp júrgenderge shara qoldanyldy. Byltyr 32 mln teńgeden astam aıyppul salyndy. Ruqsat berý komıssııasyna kemshilik anyqtalǵan kompanııalarǵa bir jyl boıy sheteldik jumys kúshin tartýǵa kelisim bermeý jóninde usynys joldadyq», − deıdi.
Basqarma ótken jyly 503 tekserý júrgizip, 775 zań buzýshylyqty ashqan. Jumys kezinde jazataıym jaǵdaıdan zardap shegýshiler sany da azaıar emes. Bıylǵy tórt aıda úsh adam oqys oqıǵa saldarynan ómirmen qoshtasypty. Igilik Aıdaruly jumys berýshilerdiń qaýipsizdik talaptaryn saqtamaıtyny osyndaı ókinishti jaıttarǵa ákeletinin aıtady. Mysaly, jaqynda sheteldik jas jigit qurylysta júrip mert boldy. Teksere kelgende, onyń jumys isteýge ruqsaty da, eńbek sharty da joqtyǵy anyqtaldy. Keıbir kompanııalar úshin bul tıimdi: sheteldik azamatty jumysqa tartqany úshin eńbek shartyn jasamaıdy, salyq tólemeıdi, esesine, jalaqysy da az.
Jyl basynan beri oblysta bes mekemeniń sheteldik jumys kúshin tartýda zań talaptaryn saqtamaı otyrǵany belgili boldy. Ásirese, rekrýtıngtik kompanııalarda zań buzýshylyq kóp baıqalady eken.
Baqytgúl BABASh,
«Egemen Qazaqstan»
ATYRAÝ
