Bul rette rýhanı jańǵyrýdy maqsat tutqan azamattar memlekettiń kórsetip otyrǵan qamqorlyǵyn jete sezinip, múmkindigin barynsha paıdalana alady. Ásirese aýyl turǵyndaryna bul másele tóńireginde kóp kóńil bólinip otyr.
Búginde jumyssyz jastardyń da qoǵamnan óz ornyn tabýyna atsalysý úlken mindet bolyp sanalady. Sondaı-aq, múmkindigi shekteýli azamattarǵa jáne kásibin ashýǵa nıetti jastarǵa qoldaý kórsetý de azamattyq paryz. Al el bolǵan soń, halyq arasynda túrli salalarǵa baılanysty túrli suraqtardyń týyndaýy zańdylyq. Osy oraıda, Jambyl oblystyq prokýratýrasy men oblystyq jastar saıasaty máseleleri basqarmasynyń uıymdastyrýymen oblystyń barlyq aýdan ortalyqtary men eldi-mekenderinde, barlyq sanattaǵy jastar men turǵyndarǵa túrli sala aıasyndaǵy máseleler boıynsha qoldaý kórsetý maqsatynda 15-26 mamyr aralyǵynda «Rýhanı jańǵyrý!» atty avtokerýen jolǵa shyǵyp, keń aýqymdy túsindirý jumystaryn júrgizgen bolatyn. Onyń ishinde «Dıplommen aýylǵa», «Serpin», «Bıznestiń jol kartasy» sııaqty baǵdarlamalar da qosymsha túsindirilip, kásipkerlik, aýylsharýashylyq, din salalary boıynsha qabyldaýlar ótkizilgen. Atalǵan shara apta basynda Taraz qalasynda jalǵasyn tapty.
Taraz qalasyndaǵy «Dostyq» alańynda uıymdastyrylǵan sharaǵa oblys prokýrory Ernat Sybanqulov, oblys ákiminiń orynbasary Erqanat Manjýov qatysyp, sóz sóıledi. Elbasynyń baǵdarlamalyq maqalasynda atap kórsetilgen qundy qaǵıdalardyń bárine toqtalyp, el damýynyń negizgi kepili rýhanı jańǵyrý ekenin áńgimeledi. Sonymen qatar, shara barysynda Taraz qalasynyń ákimi Rústem Dáýlet múgedek bala asyraýshy Maıra Abdýalıeva men muǵalim bolyp eńbek etetin Anar Atabaevaǵa páter kiltin tabys etti.
Sondaı-aq, áýlıeatalyq kásipkerler, seriktestik basshylary da Elbasy maqalasynda aıtylǵan qaǵıdalarǵa qoldaý bildirip, birqatar azamattarǵa syı-sııapat tabystady. Shara barysynda kelgen kópshilikke aqparattyq-ádistemelik materıaldar úlestirilip, master-klasstar, jeke qabyldaýlar men kezdesýler uıymdastyryldy.
Hamıt Esaman,
«Egemen Qazaqstan»
Jambyl oblysy
