«О́tken HH ǵasyrda halqymyz asa aýyr qasiretke toly kezeńdi basynan keshirgenin barshańyz jaqsy bilesizder. Qazaqstandaǵy kúshtep ujymdastyrý arqyly kelgen asharshylyqtyń aýyr zardabyn kórdi. Asharshylyqtan es jınalmaı jatyp, stalındik qandy terror men jappaı repressııanyń qasireti tóndi. Myńdaǵan qandastarymyz jazyqsyz jazalandy. Aıdaýǵa túsip, Sibirge jer aýdaryldy. Zulmatty jyldary 103 myń adam qýǵyn-súrginge ushyrap, olardyń 25 myńnan astamy atylǵan. Olardyń arasynda qazaq halqynyń kórnekti perzentteri Shákárim Qudaıberdiuly, Ahmet Baıtursynov, Mirjaqyp Dýlatov, Muhamedjan Tynyshpaev, Maǵjan Jumabaev, Sanjar Asfendııarov, Oraz Jandosov, Turar Rysqulov, Sáken Seıfýllın, Ilııas Jansúgirov, Beıimbet Maılın jáne basqa da kóptegen sańlaqtarymyz bar. Táýelsizdik tańymen birge jazyqsyz jazalanǵan arystarymyzdy aqtaý dáýiri bastaldy. Elbasynyń bastamasymen muraǵat materıaldary ashylyp, qýǵyn-súrgin qurbandarynyń tizimi anyqtalýda», dedi ákim.
Qyzyl qyrǵyn zardaby Áýlıeata óńirin de jalyndaı sharpyǵany tarıhtan belgili. «Halyq jaýy» degen jalǵan jalamen oblystyń 5 myńnan astam turǵyny jazalaýǵa ushyrap, 845 adam jazyqsyz atylyp ketken. Olardyń qatarynda Qabylbek Sarymoldaev, Sydyq Ablanov, Áshir Búrkitbaev sııaqty el ardaqtylary da bolǵan.
Sondaı-aq, shara barysynda saıası qýǵyn-súrgin jáne asharshylyq qurbandarynyń urpaǵy, M.H.Dýlatı atyndaǵy Taraz Memlekettik ýnıversıteti shet tilder kafedrasynyń aǵa oqytýshysy Lıdııa Kım sóz alyp, qasiretti kezeń týraly pikir bildirdi. Jazyqsyz japa shekkenderdi eske aldy. Al tarazdyq jas aqyn Nurbolat Joldasbek qurbandarǵa arnalǵan óleńin oqydy.
Budan keıin Taraz qalasyndaǵy dańqty mergen Ybyraıym Súleımenov kóshesiniń boıynda saıası qýǵyn-súrgin jáne asharshylyq qurbandaryna arnalǵan eskertkishke gúl shoqtary qoıyldy. Oǵan oblys ákimi bastaǵan jergilikti basshylar men qala jastary qatysty.
Sondaı-aq, osy kúni Turar Rysqulov eskertkishine de gúl shoqtaryn qoıý rásimi ótti. Jınalǵan kópshilik saıası qýǵyn-súrgin jáne asharshylyq qurbandaryn únsizdikpen eske alyp, rýhtaryna taǵzym etti.
Hamıt Esaman,
«Egemen Qazaqstan»
